VOV4.Sêdang - Kơxê lơ 11/6 a tíu pêi cheăng Chin phuh, pơkuâ roh hôp mơ’no tơdrêng tung um tơvi pơla Khu hnê tơnêi têa hbrâ mơdât COVID 19 ƀă mâu kong pơlê, pơlê kong kơdrâm ai mâu kơpong hngêi kơmăi kơmok, hnê ăm dêi pó tuá ki rơkê tơtro tung mâu hngêi kơmăi, tíu pêi cheăng ki kân. Pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ hnê mơhno hbrâ mơdât pơreăng COVID 19 tối pơchân, mâu kong pơlê kal mơ-eăm ôh tá ăm pơreăng châ xông tâ tú; tâng ai ngế tro tâ pơreăng COVID 19 tung kơpong hngêi kơmăi kơmok mê thế châ hlo tung pơla 3 hâi apoăng.

Pôa Vũ Đức Đam, Ngế pro xiâm phŏ hnê ngăn pơkuâ hôp hbrâ mơdât pơreăng COVID 19

A roh hôp, khu râ kăn pơkuâ kong pơlê Bắc Ninh, Bắc Giang, Hà Nội, Bình Dương, Long An, Tây Ninh, Bà Rịa - Vũng Tàu ƀă Pơlê kong kân Hồ Chí Minh pơrá tối tô tuăn ‘na tơdroăng ki châ mot tâ tú dêi pơreăng COVID 19 a mâu hngêi kơmăi kơmok, tíu pêi cheăng ki kân tung mâu kơpong hngêi kơmăi kơmok. Drêng ai pơreăng xông tâ tú roh má 4 tiô tối hdrối kô pơtối châ hlo mâu ngế nếo tro pơreăng xua hên ngế hiăng tro tâ ing hdrối, Khu pơkuâ hnê mơhno tơnêi têa pơkâ mâu kong pơlê ôh tá chiâng tơngôu, kal đi đo séa ngăn, pơkuâ séa ngăn pêi pro mâu troăng hbrâ mơdât pơreăng, pơklât thế pêi pro troăng 5 thế, ki má lối cho pâng rơkong môh drêng lo ing hngêi, kơdroh tơkŭm kơdrâm mơngế.

A Sa Ly tơplôu ƀă tơbleăng