VOV4.Sêdang - Kơmăng hâi lơ 2/7, Vi ƀan kong pơlê Lâm Đồng tơkŭm po roh hôp mơ’no tơdrêng tung um tơvi ƀă kơ koan cheăng, Vi ƀan mâu tơring, pơlê kong kơdrâm tung kong pơlê vâ pêi pro kơtăng mâu troăng mơdât pơreăng klêi kơ’nâi ai ngế dương tĭnh COVID 19 tung kong pơlê. Ngế tro tâ pơreăng ƀă SARS-CoV2 apoăng dêi kong pơlê Lâm Đồng cho ngế kơdrâi (46 hơnăm, ối a tơring Dà Tẻh).

Kong pơlê Lâm Đồng tơkŭm hôp thâ tung kơmăng vâ pêi pro tơdrêng mâu troăng hbrâ mơdât pơreăng

Ngế tro tâ pơreăng rơtế ƀă dêi kơnốu, pôa N.M.H, tê plâi a kơchơ Hóc Môn, Pơlê kong kân Hồ Chí Minh sap hâi lơ 19/6 troh lơ 25/6. Hâi lơ 26/6, pôa N.M.H, pơto kơdrâi ƀă rơxế honđa ing Hóc Môn vêh a hngêi a thôn Phú Hòa, cheăm Mỹ Đức, tơring Dà Tẻh, kong pơlê Lâm Đồng. Troh 22h30’ kơmăng lơ 30/6, kơdrâi pôa ai kơ-o ƀă tơngê xua mê troh a hngêi pơkeăng cheăm Mỹ Đức. Kơvâ khăm pơlât cheăm hiăng thâ ăm ối klâ kơtăn, xo mơheăm khăm ngăn ƀă ăm hlo dương tĭng ƀă SARS-CoV2.

Tiô pôa Tống Giang Nam, Kăn hnê ngăn Vi ƀan tơring Dà Tẻh tối, on veăng pôa H. drêng ing Hóc Môn vêh ai luâ tíu mơdât pơreăng dêi tơring laga tơbleăng ôh tá tơdrăng khât. Klêi kơ’nâi khăm ngăn châ hlo dương tĭnh, tơring hiăng rĕng mơdât ôh tá ăm lo pa kong a thôn Phú Hòa ƀă pêi pro thâ mâu troăng hbrâ mơdât pơreăng. Nôkố tơdroăng ti tăng mâu ngế tro tâ pơreăng, ăm ối klâ kơtăn, xo mơheăm khăm ngăn mâu ngế ối achê ƀă ngế tro tâ pơreăng dế châ kong pơlê Lâm Đồng pêi pro.

A Sa Ly tơplôu ƀă tơbleăng