Pôa A Hà, Phŏ Kăn hnê ngăn Vi ƀan cheăm Đăk Plô, tơring Đăk Glei, kong pơlê Kon Tum ăm ‘nâi, tíu ki ai pơreăng tâ tú a kơpôu, ro a tíu ki kơ’nêi Đăk Đơ, thôn Bung Koong. Tung 10 hâi hdrối a tíu kơ’nêi kơpôu ro kố ai 4 to kơpôu ƀă 8 to ro tro pơreăng tá hâi ‘nâi nhên xiâm kối tâ tú ing lâi. Pakĭng mê, ai 110 to kơpôu, ro dế tro pơreăng.

Tiô tíu xiâm ngăn pêi chiâk deăng tơring Đăk Glei tối, mơni ai hên tơdroăng pro kơpôu, ro hlâ cho xua tro pơreăng mơheăm tơkŭm. Tíu ki kơ’nêi kơpôu ro Đăk Đơ nôkố ai 300 to kơpôu, ro dêi 88 rơpŏng kuăn pơlê thôn Bung Koong, cheăm Đăk Plô, tơring Đăk Glei.

Hlo tơdroăng ki kơpôu, ro a tíu kơ’nêi hlâ, Tíu xiâm ngăn pêi chiâk deăng tơring Đăk Glei hiăng hbru ăm 80 lit pơkeăng, 500kg puâ, 20 plâ hmân ếo rak châ hbrâ mơdât pơreăng ƀă pơkeăng pơlât ăm mâu kơpôu, ro ki tro pơreăng.