Pơreăng xông tâ tú a 2 rơpŏng kuăn pơlê a thôn 11 ƀă thôn 5 cheăm Ea Kly. Tung mê, pơreăng apoăng châ hlo a hâi lơ 29/10 a rơpŏng pôa Nguyên Nhu Lực, ối a thôn 11 ƀă kơxô̆ í peâp tro tâ pơreăng vâ chê 800 to í peâp. Pơreăng má péa châ hlo a hâi lơ 5/11, a rơpŏng pôa Ngô Đức Tình ối a thôn 5, ƀă 750 to í peâp tro tâ pơreăng, tung mê ai 500 to peâp ƀă 250 to í. Klêi kơ’nâi tơdah mơnhên ‘na mâu pơreăng, kăn ƀô̆ pơlât mơnăn hiăng xo í vâ khăm ngăn, klêi khăm ngăn châ hlo yương tĭnh ƀă virus A/H5N1.

Tíu xiâm pơlât mơnăn hiăng tơrŭm ƀă khu râ kăn pơkuâ tơkŭm prâu tah tâi tâng kơxô̆ í peâp tro tâ pơreăng; pêi pro xôh pơkeăng kơdê pơreăng a kơdroăng păn, rơtâ tá klôh prâu tah ƀă kơpong rơtâ tá mê. Kơ koan xiâm Păn mơnăn mơnôa ƀă Pơlât mơnăn kong pơlê Dak Lak hiăng xing xoăng 36 lit trếo pơkeăng vâ cheăm pêi pro tơdroăng xôh pơkeăng kơdê pơreăng; tơrŭm ƀă Tíu xiâm mơdât pơreăng kong pơlê Dak Lak tơkŭm séa ngăn, mơdât pơreăng í peâp a mơngế a cheăm Ea Kly.