Nôkố, tung lâp tơnêi têa hiăng ai 741 to tíu ai pơreăng châi klêa chu châu Phi a 31 to kong pơlê, pơlê kong kân. Krê a Dak Lak, pơreăng hiăng tâ tú a 14 rơpŏng ối tung 9 thôn; athế prâu tah tâp kơđu 130 to chu. 7 to cheăm, bêng a kong pơlê xuân ối ai pơreăng, tung mê 3 cheăm Dliê Ya, Krông Năng ƀă Tam Giang pơreăng tá hâi luâ 21 hâi. Mơni pơreăng châi klêa chu châu Phi kô tâ tú rế hên, malối cho a mâu cheăm ki păn hên chu, tơdjâk troh kơvâ păn chu, tơdroăng tê hơ’nêh chu ƀă kong prâi.

Hlo tơdroăng pơreăng tâ tú ôh tá tơniăn kố ƀă mơni kô tâ tú troh lâp lu, hâi lơ 25/7, Vi ƀan hnê ngăn kong pơlê Dak Lak hiăng ai mơéa pơkâ thế mâu khu râ, pơkuâ cheăng ƀă kăn pơkuâ cheăm kong pơlê tơbleăng kơtăng, tơdâng tơ’mô mâu troăng hơlâ hbrâ mơdât pơreăng tung lâp kong pơlê.

Tung lâp kong pơlê Dak Lak nôkố ai 1,2 rptuh to chu. Sap ing apoăng hơnăm troh nôkố, Dak Lak hiăng pâk pơkeăng rêm khế rôh má 1 ăm kuăn kiâ ki păn. Laga, ai mâu cheăm ki ‘nâ xuân ối ai kơxô̆ mơnăn pâk pơkeăng bu iâ, malối cho a mâu khu chu ƀă í peâp.

Jâ Đặng Thị Thủy, Phŏ kăn pơkuâ Khu ngăn chiâk deăng ƀă Kong prâi kong pơlê Dak Lak ăm ‘nâi: Ƀă tơdroăng ki mơdêk rơdêi pâk pơkeăng hbrâ mơdât pơreăng, kơvâ cheăng kong pơlê hiăng hbrâ mơdât kơtăng tơdroăng ki pơto chơ, xâ chêh hơ’nêh chu, tê mơdró mơnăn mơnoâ; tơdrêng amê hlối hnê mâu rơpŏng pêi pro păn chu tơniăn sinh hok, mơgrúa lĕm kơdroăng rông, rĕng châ hlo ai pơreăng ƀă hbrâ mơdât mâu tíu ki ai pơreăng.

“Ƀă kong pơlê nôkố gá chía rơdâ, ngin thăm mơnhông cheăng hnê mơhno sap ing mâu trăm, malối nhŏng o kăn ƀô̆ kih thuât a mâu trăm athế tơbleăng teăm tơdrêng ăm Khu xiâm, tí tăng ‘nâi plĕng ăm kăn pơkuâ Khu râ pơkuâ cheăng vâ hnê mơhno teăm tơdrêng. Cheăng kố ngin kơjo gum xiâm. Kăn ƀô̆ trăm athế tŏng gum tơdrêng ăm cheăm, rơtế ƀă kăn ƀô̆ cheăm. Drêng kăn ƀô̆ cheăm pêi klêi hnoăng cheăng tơkéa vâ tối ƀă kơvâ cheăng pêi klêi tơdroăng pơkâ pêi”.

A Gia Lai, sap ing mơ’nui khế 6 troh nôkố, tung lâp kong pơlê hiăng ai 5 tíu pơreăng châi klêa chu châu Phi ƀă tâi tâng mâu chu ki hiăng prâu tah lối 300 to chu. Tơdroăng ki hvât chu hlâ hmâng vâ a têa kroăng, têa plông pro ‘mêi hyôh kong prâi mâu chu ki tro pơreăng mê hên a cheăm môi tiah Bình Hiệp, Bình An, Hòa Hội, Tuy Phước Bắc, Hoài Ân, Ân Tường ƀă Bồng Sơn. Tơdroăng kố dế rế pro tâk tơ’nôm ‘na pơreăng châi klêa chu châu Phi tâ tú tung lâp lu. Măng tĭng hdrối, mâu kăn pơkuâ bêng Hội Phú 9Gia Lai) hiăng athế plâ hâi măng xo chu ki vâi hvât a têa plông ƀă tâp kơđu tiô pơkâ hbrâ mơdât pơreăng. Pôa Vũ Mạnh Định, Kăn hnê ngăn Vi ƀan bêng Hội Phú ăm ‘nâi.

“Vi ƀan hnê ngăn bêng hiăng hnê mơhno khu kŏng an lăm ngăn, hbrâ mơdât tơdroăng ki pơto chơ chu a bêng, po ngăn camera tí tăng mâu ngế ki hvât chu a têa plông Hội Phú. Tâng ‘nâi kô pơxâu phâk kơtăng. Má péa cho hnê mơhno khu pơkuâ ngăn lêng pơtroh kuăn pơlê lăm tŏng xo chu, xôh pơkeăng, tâp kơđu troh 1 chôu kong măng nếo klêi; hnê tối mâu rơpŏng kuăn pơlê rơtế hbrâ mơdât pơreăng”.

Hlo tơdroăng ôh tá tơniăn kố, sap ing hâi lơ 16/7, kong pơlê Gia Lai hiăng mơjiâng pro mâu tíu gâk mơdât pơreăng a mơnăn păn tơdjâk troh a 4 tíu ki xiâm a mâu troăng kân mê cho: Bình Đê, Song An, Ia Khươl ƀă Ia Le. Mâu tíu gâk kô pêi cheăng pơtối vâ mơdât krá tơniăn tơdroăng pơto chơ mơnăn mơnoâ a troăng ƀă tơmeăm châ pro ing mơnăn mơnoâ mot tung kong pơlê.

Pakĭng mê, kơvâ cheăng ai tơdjâk troh dêi kong pơlê dế tơbleăng tơdâng tơ’mô hên troăng hơlâ hbrâ mơdât pơreăng môi tiah lăm ngăn tíu ki păn chu, séa ngăn tơdroăng ki xâ chêh hơ’nêh chu, xôh pơkeăng kơdê pơreăng, veăng gum hbrâ mơdât pơreăng tâng ai ƀă mơdêk rơdêi cheăng tối tơbleăng, hnê tối mơdêk ki rơkê plĕng dêi pơlê pơla.