Dak Lak dế mot tung rơnó khăng khoăng, tối hdrối kong kô tô khăng khoăng rơdâ a hên tơring. Kơvâ pêi chiâk deăng ƀă mâu tơring tung kong pơlê dế thăm pêi pro mâu troăng hbrâ tăng têa tôh vâ tơniăn tung pêt mơjiâng tơmeăm. Lâp kong pơlê Dak Lak ai lối 850 long, rơchôa, hno têa ƀă vâ chê 620 long, rơchôa, hno têa, lối 160 rơchôa ƀă 78 tíu hrik ‘no têa.

Riân troh mơ’nui rơnó mêi 2024, hên long, rơchôa, hno têa a mâu tơring MDrak, Ea Kar, Lak, Ea Hleo bu hdoăng châ 50% troh 80% têa. Mâu long, rơchôa têa tung kong pơlê, kơxô̆ têa xuân dế xiâ chu ối iâ tâ sap ing 10 – 15% tâng pơchông ƀă roh kố hơnăm 2024.

Tiô pôa Nguyễn Văn Hà, Phŏ Kăn pơkuâ Khu pơkuâ ‘na pêi chiâk deăng – Mơnhông thôn pơlê Dak Lak, tơdroăng tá têa kroăng têa klông ƀă rơchôa dêi kong pơlê xiâ, dế cho tơdroăng ki mơnhâu ƀă pêt mơjiâng tơmeăm pêi lo ing chiâk deăng. Khu hiăng pơkâ mâu tơring hbrâ po rơdâ pêi pro mâu troăng hbrâ.

Pơchân tối mâu tơring thế séa ngăn tơniăn tơdroăng xúa têa, mơ’no têa tơtro vâ tơniăn bê têa tôh. Ƀă mâu loăng plâi ton hơnăm dế mơhnhôk mâu troăng pro klŏng tôh têa lo kơto rêm xiâm, tôh kơdĭng têa.