Lâp kong pơlê nôkố ai 619 to long têa ƀă ‘măn têa lối 650 rơtuh met khô̆i têa; 161 to rơchoâ, 76 to tíu hrik têa, ƀă péa to troăng hno têa. Xua tơdjâk dêi kong mê khía mơhot, hên long, rơchoâ têa hiăng tơ’nhiê ó, pro ôh tá tơniăn ăm tâi tâng long rơchoâ têa, malối cho hnoăng cheăng ki mơ’no têa tôh kế tơmeăm.

Pôa Nguyễn Công Hạnh, kăn phŏ pơkuâ Kŏng ti pêi cheăng tiô rơnó môi tung Pơkuâ ngăn long rơchoâ têa Dak Lak tối, nôkố kŏng ti dế pơkuâ ngăn 345 to long rơchoâ tŭm túa, kum ăm tơdroăng ki tôh ăm dâng 80 rơpâu ha mau hdrê loăng pêt ƀă păn roăng ká xi xŏng. Tung rôh kong mê têa kân pơla hdrối kố nah, hiăng ai mâu rơchoâ long ki ‘nâ a tơring Ea Súp tro tơ’nhiê ó; hên long rơchoâ a mâu tơring Krông Ana, Lak, Krông Bông mơni kô ôh tá tơniăn ó. Khu mơdró kâ hiăng riân ngăn ki tro lŭp mơjiâng túa pơkâ rêm râ ai hnoăng pơkuâ xoăng liăn vâ ‘mâi rơnêu la xuân tá hâi châ xoăng liăn.