Hâi lơ 4/11, Khu rak ngăn pơkeăng nhâ loăng, khu xiâm ngăn pơkeăng pơlât tơrŭm ƀă Khu ngăn pơkeăng Dak Lak tơkŭm po hneăng Hôp hnê tối tơbleăng tơdroăng ‘no liăn cheăng tŏng kum mơnhông kơpong pêt nhâ loăng pơkeăng tung pơkâ dêi tơnêi têa ‘na mơdêk cheăng kâ - rêh ối kơpong hdroâng kuăn ngo ƀă kong ngo pơla 2021-2025. Tung pơla rôh má 1 châ pêi pro troh hơnăm 2025, tơdroăng ai pơkâ cho rôh apoăng pơxiâm mơjiâng pro ki pơxúa ‘na pơkeăng loăng nhâ; pơxiâm hlê tơdroăng păn pêt nhâ loăng pơkeăng tiô tơdroăng ki pơxúa ƀă rak tơniăn xiâm gen dêi pơkeăng, tơniăn mâu pơkâ pêi ƀă tơdroăng pơkâ rak ngăn ki tơƀrê tơrŭm ƀă kring vế hlối mơdêk pêt kong krá ton.

Mâu tơdroăng tơkêa bro mơnhông mơdêk pêt nhâ loăng pơkeăng kơnía a mâu kong pơlê, tơring, cheăm kơtiê xơpá kơpong hdroâng kuăn ngo rêh ối ƀă kong ngo, xúa ki iâ 50% mơnế pêi cheăng cho hdroâng kuăn ngo, xua mâu khu tơrŭm cheăng kâ ƀă mâu ngế rơkê, mâu rơpŏng hngêi dêi mâu hdroâng kuăn ngo, rơpŏng kơtiê xơpá rêh ối tung kơpong ai tơnêi nhâ loăng tơtro ƀă hlối veăng pêi ƀă tơhrâ veăng kum rôe tơmeăm ki pêi lo tê  tung kơpong.