A rôh leh, mâu kăn ƀă mâu đoân viên, droh rơtăm Dak Lak hiăng pêt 80 xiâm loăng karê prăng ing 3m tơngi klêng a drô kĭng troăng kân kơxô̆ 1 ƀă troăng kân kơxô̆ 2 dêi tơdroăng tơkêa bro kơpong pro pơlê nếo Thôn 1, cheăm Hòa Thắng, pơlê kong kơdrâm Ƀuôn Ma Thuột. Tơdrêng ƀă tơdroăng mơ-eăm pêt ƀă rak ngăn loăng ngiât, Khu xiâm ngăn chiâk deăng ƀă Mơnhông thôn pơlê Dak Lak pơkâ thế mâu tíu pêi cheăng cheăm, tơring tơrŭm ƀă vâ pêi châ tơƀrê tiô tơdroăng pơkâ rế hên loăng kong Việt Nam pơla hơnăm 2021-2030, hvái ngăn tơdroăng vâ pêi troh hơnăm 2050.

Tung mê, tơkŭm hnê tối mơdêk kuăn pơlê hlê plĕng ‘nâi rak ngăn kong, tơplâ mơdât mâu khu ‘mêi ko ‘nhiê kong, hdi tơnêi kong muih pêi chêk, pêi tro tơdroăng rak ngăn kong, hbrâ ví hyôh kong prâi hơ’lêh, séa ngăn ki pro ‘mêi hyôh kong prâi ‘mâi hơ’lêh ƀă mơnhông ăm hyôh kong prâi lĕm ing tơdroăng pêt kong, rak ngăn kong ƀă rak ngăn loăng ngiât.