Hâi lơ 20/10, Vi ƀan hnê ngăn kong pơlê Dak Lak hiăng tơkŭm po roh hôp mơgêi pơtân 5 hơnăm rak vế, pêi pro tơdroăng pơkâ kơxô̆ 98/2018 dêi Chin phuh ‘na troăng hơlâ mơhnhôk thế mơjiâng Khu pêi cheăng tơrŭm, tơrŭm tung pêi chiâk pêi deăng, tê mơdró dêi kế tơmeăm pêi lo ing chiâk deăng hnối  tơrŭm ƀă khu mơdró kâ vâ châ tê mơ’no dêi kế tơmeăm ki pêi lo ing chiâk deăng.

Tiô tơdroăng tối tơbleăng a roh hôp mê, tiô troăng pơkâ kơxô 98 hơnăm 2018 dêi Chin phuh, mê kong pơlê Dak Lak hiăng mơhnhôk tro troăng hloh hlê rơkê plĕng, châ tơƀrê tung pêi pro tiô troăng hơlâ ki păng ‘nâng, kum hên khu mơdró, khu pêi cheăng kâ tơrŭm ƀă khu kuăn pơlê ki vâ khoh cha ai hnoăng cheăng ki châ mơnhông tung pêi chiâk pêi deăng, pêi lo hên liăn ngân kế tơmeăm. Lâp kong pơlê dế nôkố ai dâng 150 Khu pêi cheăng tơrŭm ‘na chiâk deăng, lối 270 chiâk deăng ki pêt mơjiâng hên hdrê loăng, mâu kơdroăng păn mơnăn mơnôa, kơpôu ro ƀă lối 15 rơpâu 500 rơpŏng kuăn pơlê ki châ tơrŭm tung tê mơdró kâ ƀă khu mơdró.

Tơdroăng ki veăng tơrŭm cheăng kâ, tê mơdró pro pơxúa kân khât ăm rêm khu ki veăng pêi. Mâu khu mơdró, Khu pêi cheăng tơrŭm khoh châ ai liăn ngân cho vâ ai kế tơmeăm ki tơniăn, dâi lĕm khât; châ tê mơ’no dêi kế tơmeăm pêi lo ing chiâk deăng kơnôm ing tơdrŭm cheăng, tăng cheăng pêi ăm kuăn pơlê.

Tơdrêng amê, tơdroăng tơrŭm cheăng mơjiâng mâu kế tơmeăm krúa, tơniăn, ‘nâi xiâm kối nhên ăm kuăn pơlê ki rôe xúa, tăng mơjiâng cheăng pêi ăm mơngế kuăn pơlê ki pêi cheăng. Tơdroăng ki xuá mâu kih thuât rơkê plĕng tung pêi chiâk pêi deăng, pêi cheăng kâ tung tơdroăng ki tơrŭm tê mơdró mê kô ai tơdjâk troh túa ki lĕm tro dêi kong pơlê, tơring, cheăm.