Hneăng hôp châ tơkŭm po klêi kơ’nâi mâu tơdroăng ôh tá tơniăn, tơxup tơbriât ƀă nhôm dêi pó ôh tá tơdrăng lĕm, mê khu tê mơdró tê ngi kong têa ê tơmeăm kố a Dak Lak trâm klêi kơ’nâi mâu plâi sầu riêng apoăng châ tê ngi kong têa ê tiô troăng chính ngạch.

Tiô tơdroăng hneăng hôp, troh nôkố Dak Lak hiăng pêt châ lối 15.200 ha plâi sầu riêng, tâk 13.000 ha tâng pơchông hơnăm 2015. Kơxô̆ plâi hơnăm 2022 châ lối 150 rơpâu tâ̆n, ƀă tiô tối hdrối kô tâk 300 rơpâu tâ̆n a hơnăm 2025. ‘Na tê ngi kong têa ê, hơnăm 2022 cho hơnăm apoăng plâi sầu riêng Dak Lak xuân môi tiah lâp tơnêi têa, châ tê tiô troăng chính ngạch troh a kong têa Sinuâ, tiú rôe 99% kơxô̆ plâi sầu riêng tung lâp plâi tơnêi.

Hnôu dêi môi khu tê mơdró plâi sầu riêng a Dak Lak

Vâ rak tơniăn tơdroăng tơvâ tơvân tung tơdjêp mơnhông mơdêk châ xo liăn ing plâi sầu riêng, mơdêk ivá tơbriât tung tê ngi kong têa ê, khu râ kăn pơkuâ Vi ƀan kong pơlê Dak Lak pơkâ thế mâu kơ koan ki tơdjâk mơdêk tơdroăng pơkuâ tơrŭm rơkê ƀă tơleăng teăm tơdrêng mâu tơdroăng ki nếo, mơhnhôk mơjiâng khu pêt plâi sầu riêng vâ pêi rơkê kơvâ pêt mơjiâng tơmeăm khoăng kố.