Mâu hâi ki kố, rŏng pôa Y Kem, ối a ƀon Bu Păh, cheăm Trường Xuân, tơring Dak Song ối ôh tá hmiân tuăn xua chiâk kơphế dêi rơpŏng nếo tro vâi tong krí. Pôa Y Kem tối ăm ‘nâi, lối 50 xiâm kơphế tro vâi tong krí, krí ôh tá pơ’lâng, tro lŭp dâng 400 kilô. Kố ôh tá xê roh apoăng kơphế dêi pôa tro vâi krí tong, xua chiâk kơtăn hngêi lối 1 km:

“Hiăng 3 hơnăm kố, pơrá tro hía kơphế a peăng kố. Xua rơnó kơphế mê cho hên ngế a kong pơlê ki ê troh krí kơphế, á ôh tá kơbố ôh, a thôn ki lâi, xua mê drêng tro vâi krí tong mê xuân pá vâ châ ‘nâi’’.

Pôa Y Kem a kơdrum kơphế nếo tro vâi tong krí

Châ ‘nâi xuân a tíu kố rơnó krí kơphế hơnăm hdrối, ai péa rơpŏng tro mâu ngế tong krí tong kơphế. Vâ rak vế tơmeăm, kuăn pơlê ai chiâk deăng tung kơpong hiăng tơrŭm ƀă dêi rơpó pơ’lêh dêi rơpó tơkŭm po séa ngăn a kơmăng. Mâu tơdroăng tong tơmeăm xuân ai xua kơdrum chiâk deăng kân rơdâ, hơngế kơpong kuăn pơlê rêh ối ƀă ai hên troăng prôk lăm. Xua mê, pa kĭng tơdroăng tơrŭm thăm séa ngăn, a mâu troăng kân kuăn pơlê ối krâ camera séa ngăn vâ hbrâ mơdât mâu ngế tong.

Pôa Lê Ngọc Ga, ối a cheăm Trường Xuân, tơring Dak Song, tối ăm ‘nâi:

‘’Kơmăng mê đi đo lăm a chiâk deăng. Klêi mê á krâ tơ’nôm camera vâ séa ngăn a peăng ngiâ hngêi, tiô troăng prôk. Drêng kăn ƀô̆ thôn kal mê pin po ngăn camera mê vâ vâi châ hlo mâu ngế ki ‘nhê tơmeăm lơ tong tơmeăm, vâ kuăn pơlê pêi kơphế hmiân tuăn tâ’’.

Kŏng an hiăng rup 5 ngế tong krí kơphế

Tơdroăng tong kơphế pro kuăn pơlê tô tuăn, xua vâi ôh tá xê to hía tơmeăm, mê mâu xiâm kơphế hmâ tro mơngế tong đôu pôe tâi tơkâng, pá rak ngăn vâ kơphế chiâng lĕm nếo, kô kơdroh kơphế a rơnó kơ’nâi ah. Ôh tá xê to tong kơphế, hên ngế hlo drêng rơnó krí kơphế vâ tong. Nếo achê kố, môi rơpŏng a cheăm Dak Sin, tơring Dak Rlấp, hiăng tro mơngế krí kơphế tong rơxế hon đa ƀă mâu kơxô̆ liăn, mêa klêi mê kơtâu hdâ. Ƀă a bêng Quảng Thành, pơlê kong kơdrâm, khu kŏng an châ hlo mâu ngế kơtâu hdâ hmuâ kŏng an tăng rup mot tung khu mơngế troh lăm pêi cheăng vâi ƀă hía hé.

Vâ tơniăn pơlê pơla tung rơnó krí kơphế, mâu tơring a Dak Nông hiăng thăm pơtâng tối, tơbleăng tối hên troăng, tơdroăng ki pro dêi mâu ngế xôi. Khu kŏng an a tơring, cheăm xuân thăm séa ngăn, pơkuâ a mâu pơlê, cheăm ki hên mâu ngế xôi, séa ngăn tơdroăng ối pơtân ƀă mâu ngế lăm pêi cheăng hmâng vâ, mơngế ki lăm pêi cheăng vâi tiô rơnó ƀă hía hé. Kŏng an Dak Nông pơchân tối kuăn pơlê drêng mung mơngế pêi cheăng kal séa ngăn mơ-éa tung châ ƀă pêi tiô tơdroăng kĭ pro mơ-éa ối pơtân tiô pơkâ.

A rơnó krí kơphế, kuăn pơlê tô tuăn tơdroăng tong rế tâk hên

Đăi ŭy Nguyễn Văn Đô, Kăn phŏ Kŏng an cheăm Trường Xuân tối, rơtế ƀă khu cheăng, tơdroăng ki kơchăng dêi kuăn pơlê kô kum kơdroh mâu ngế pro xôi tung rơnó krí kơphế. Môi tiah roh tơdroăng dêi rơpŏng pôa Y Kem, kŏng an cheăm hiăng séa ngăn, rĕng rup châ 5 ngế tong krí kơphế rơpŏng pôa Y Kem, kŏng an cheăm hiăng séa ngăn, rĕng rup 5 ngế krí tong kơphế.

Đăi ŭy Nguyễn Văn Đô tối ăm ‘nâi: ‘’Tung rơnó khí kơphế rêm hơnăm mê kŏng an cheăm xuân mơjiâng pơkâ gâk kring tơmeăm kuăn pơlê, pơtâng tối vâ kuăn pơlê hlê plĕng hbrâ mơdât mâu ngế xôi, ki má lối cho mâu ngế tong tơmeăm. Kŏng an cheăm xuân đi đo tơrŭm ƀă tôh gâk kring, tôh gâk kring tơniăn lăm séa ngăn vâ kơdroh tơdroăng hiá tơmeăm khoăng dêi kuăn pơlê tung rơnó krí xo tơmeăm. Pakĭng mê, xuân ‘nâi nhên kơxô̆ mơngế ing pơlê ki ê troh pêi cheăng lơ rêh ối; ƀă đi đo krếo kơ-êng kheăn hôu mơngế ki tong tơmeăm khoăng’’.