Ngoh Lê Đình Tứ, ối a thôn 4, pơlê kân Đăk Đoa, tơring Đăk Đoa, kong pơlê Gia Lai nếo mơhriâm pêt plâi krui kơxái ki apoăng, tâi tâng kơxô̆ liăn mơ’no pêt ai vâ chê 100 rơtuh liăn, tung kơdrum pêt dâng 300 xiâm. Ngoh Tứ loi dêi tiah kố, ngoh kô pêi pêt, rak ngăn tiô túa hưh cơ, plâi krui kô dâi lĕm, kô tê châ kơnâ luâ tâ a kơchơ. Laga, rơnó krí plâi apoăng, yă tê bu châ a kơlo 4 rơpâu 1 kilô. Tâng yă xuân u ối tiah  mê, rơpŏng ngoh kô tro lŭp hên yôh. Pói tơngah “plâi krui krúa, dâi lĕm ngah kô châ tê ƀă yă ki to kơnâ” môi tiah ngoh hiăng tơmiât, la păng ‘nâng ti xê ai tiah mê:

“Plâi krui hiăng tum athế kri tê yôh. Tâng hiăng tum pin ôh tá krí tê ga kô ruih tâi tâng. Pin rah xo hdrê plâi krui ki má 1 vâ tê xuân ối trâm hên pá puih ‘nôi, la khu plâi krui ki krúa lĕm, kân, dâi, ôh tá xê ai hên. Pơla hdrối kố nah, vâi ki rơkê ‘na chiâk deăng hiăng hnê pêi pêt, rak ngăn vâ plâi krui kô krúa lĕm, á hmâng mơni kô chía pá khât xua athế djâ dêi plâi krui mê vâ test mơnúa ngăn, môi hdroh lăm test dêi mê kơnâ châ 3 rơtuh. Vâi rak lôi liăn pin tơdâng ƀă ing 15 troh 30 tâ̆n mê nếo mơdrếo, ‘nâi pro ti lâi xếo, yă ga kơnâ luâ tâ 3 hdroh tâng vâ pơchông ngăn ƀă plâi krui ki tiah hmâ”.

Dế nôkố, a kong pơlê Gia Lai ai kơpong chiâk deăng ki pêt plâi krui kơxái lối 5 rơpâu ha châ pêt sap ing 15 troh 17 tơring, pơlê kong krâm, pơlê kong kơdrâm; ai 3 toăng hngêi kơmăi ki uâ mơdiê plâi krui kơxái ki kân, tâi tâng ivá cheăng dêi mâu hngêi kơmăi ki mê troh a hrĭng rơpâu tâ̆n rêm hơnăm. Pakĭng mê, Gia Lai xuân ai 20 tíu ki tâ tung tơdrong ƀă 19 kơpong ki pêt plâi krui kơxái hiăng châ hbru ăm mah kơxô̆. Laga, tâi tâng mâu tơdroăng ki mê xuân ôh tá kâi hơ’lêh yă dêi plâi krui kơxái, rơpâ xuân chu rơpâ xêh tiah mê.

Pôa Lê Tấn Hùng, Kăn phŏ ƀơrô ngăn ‘na chiâk deăng ƀă mơnhông thôn pơlê dêi tơrintg Đăk Đoa tối ăm ‘nâi: Dế nôkố 20% tung tâi tâng 700 ha deăng pêt plâi krui kơxái a tơring, hiăng châ tơdjêp tơrŭm mơdró kâ ƀă mâu khu mơdró kâ. Thăm nếo, tung pơlê mâu kuăn pơlê tơrŭm cheăng xuân ôh tá châ tê dêi yă ki chía kơnâ. Ki xiâm mê, xua pơla kĭ tơkêa mê cho tung pơla yă plâi krui dế ối a kơlo ki kơnâ, kuăn pơlê hiăng rah xo túa ki vâ tê dêi plâi a kơchơ mê khoh chiâng ai yă pơrá phá dêi pó:

“Tơdroăng tơkêa pơla khu mơdró kâ ƀă mâu rơpŏng kuăn pơlê sap ing hâi kĭ tơkêa apoăng, mê tơdroăng ki pêi mơjiâng plâi xuân mơ’no tê ƀă yă ki mê. Lơ ai tơdroăng tơkêa rôe tiô yă a kơchơ, kuăn pơlê rah xo vâ tê tiô yă a hngêi kơchơ. Mâu hngêi kơmăi xuân ối rôe ki kuăn pơlê tro tiô yă kơchơ. A kơchơ to kơnâ yă mê vâi rôe xuân to kơnâ, tâng a kơchơ chu yă mê vâi rôe xuân chu yă há”.