Pơla hơnăm 2017-2022, riân rêm hơnăm kong pơlê ai 63 rơpâu rơpŏng kuăn pơlê pêi chiâk tê mơdró rơkê rêm râ, tung mê ai 297 rơpŏng kuăn pơlê pêi cheăng tê mơdró rơkê râ xiâm tơnêi têa. Mâu rơpŏng kuăn pơlê ki pêi chiâk mê hiăng kum ăm lối 320 rơpâu ngế ai cheăng pêi, pêi lo liăn tâng riên rêm  ngế sap 4,5 troh 6 rơtuh liăn/khế.

Mâu rơpŏng kuăn pơlê ki pêi chiâk tê mơdró rơkê a Gia Lai xuân hiăng veăng mơdêk pơ’lêh pêt loăng plâi, păn mơnăn, xúa ki rơkê tung pêi chiâk, mơ-eăm pêi cheăng kâ tơkâ luâ xơpá hrâ mơnguâ, mơ-eăm pro kro mơdrŏng; mơjiâng thôn pơlê nếo.

Pơla hơnăm 2022-2027, rêm râ khu mơnhên pơtối po rơdâ, mơdêk mơhnhôk cheăng rế trâu tâ, ai pơxúa ƀă tơƀrê. Rôh kố, Vi ƀan kong pơlê Gia Lai diâp ƀâng kơdeăn khĕn ăm 18 khu pú hên, 94 ngế; Khu ngăn kuăn pơlê pêi chiâk deăng kong pơlê diâp ƀâng kơdeăn khĕn ăm 17 khu pú hên ƀă 42 ngế ki ai hnoăng pêi cheăng kơhnâ tung mơhnhôk kuăn pơlê tơ’noăng pêi chiâk, tê mơdró rơkê hơnăm 2017-2022.