A pơlê kong kơdrâm Ƀuôn Ma Thuột, kong pơlê Dak Lak, Khu ngăn tiu Việt Nam tơkŭm po hneăng hôp lâp plâi tơnêi ‘na kơvâ cheăng pêt tiu Việt Nam. Kố cho rôh  vâ mâu khu pêi pêt, uâ pơliê ƀă tê ăm kong têa ê kloăng tiu hơ’lêh túa pêi cheăng, tối ăm dêi rơpó ‘nâi mâu tơdroăng ƀă mâu tơdroăng ki xơpá, tơvâ tơvân, tơbleăng troăng rơhlâ pêi pro vâ tơkâ luâ xơpá vâ mơdêk cheăng kâ kơvâ ‘na tiu tung lâp plâi tơnêi. Tiô jâ Hoàng Thị Liên, Kăn hnê ngăn Khu pêt tiu Việt Nam, pơkâ thế pêi lĕm dêi mâu kong têa ki rôe rế ton rế kơtăng tâ. Xua mê, vâ tơniăn ki pơxúa dêi kơvâ pêi tê rôe tiu, mơdêk ki pêi lĕm hiăng chiâng môi tơdroăng kal khât.

A hneăng hôp, pôa Vũ Bá Phú, Ngế xiâm dêi kăn xiâm mơhnhôk tê mơdró dêi khu xiâm ngăn tê mơdró ăm ‘nâi, Việt Nam nôkố xuân cho tơnêi têa ki pêt ƀă tê tiu hên má môi lâp plâi tơnêi. Hơnăm 2022 tơnêi têa pin tê ăm kong têa ê châ 220 rơpâu tâ̆n, châ 55% tung tâi tâng kloăng tiu ki tê tung lâp plâi tơnêi. Lagá, vâ mâu tiu dêi Việt Nam pêi lo châ ô eăng châ tê mơdró a kơchơ lâp plâi tơnêi krá tơniăn ton, kơvâ ngăn pêt tiu ối hên tơdroăng thế pêi pro.