Khu ngăn pơlât mơnăn kong pơlê Kon Tum hiăng pơtroh môi ngế phŏ kăn ngăn pơlât mơnăn ƀă 5 ngế kăn ƀô̆ kih thuât troh a 2 to cheăm: Xốp ƀă Đăk Nhoong gum khu ki ai tơdjâk troh tơring Đăk Glei mơdât pơreăng, tơdrêng amê hlối hnê kuăn pơlê ngăn rak, pơlât ăm mâu kơpôu, ro ki tro pơreăng.

Rơtế amê Khu păn mơnăn ƀă pơlât mơnăn kong pơlê Kon Tum hiăng hbru ăm tơring Đăk Glei 300 lit trếo pơkeăng, 2.500 klŏng vaccine pâk hbrâ mơdât pơreăng, vâ pơreăng ôh tá châ tâ tú a mâu thôn: Đăk Nhoong, Đăk Ung, cheăm Đăk Nhoong ƀă thôn Xốp Nghét, cheăm Xốp tâ tú lo pa gong.

Pôa Ưng Văn Thanh, ngế xiâm ngăn tơdroăng păn mơnăn ƀă pơlât mơnăn kong pơlê Kon Tum ăm ‘nâi: Kơxô̆ kơpôu, ro ki tro pơreăng hdró kơpong mê ah hnê kuăn pơlê rak ngăn pơlât. Khu kăn pơkuâ cheăm tâ hlá mơ-éa a kơƀeăng tơbleăng kơpong ai pơreăng kuăn pơlê pôi tá roê tê, pơto chơ kơpôu, ro, lo mot tung kơpong ki ai pơreăng. Pơtối tung môi măng tĭng rêm hâi xôh pơreăng môi xôh kơpong ki ai pơreăng tâ tú.