Vâ thăm mơdêk hên ó tâ nếo tơdroăng cheăng tơrŭm séa mơnhên ngăn, tí tăng ‘nâi, tơplâ, mơdât ƀă rup tơleăng tơdrêng mâu tơdroăng ki ko kếo ‘nhiê loăng, mê kơxê lơ 28/10, a pơlê kong kơdrâm Kon Tum, Vi ƀan hnê ngăn mâu kong pơlê Kon Tum - Quảng Nam - Quảng Ngãi tơkŭm po Hneăng hôp séa mơnhên ngăn ki hiăng châ chiâng pêi pro tro tiô Luât tơrŭm cheăng pơkuâ rak ngăn kong achê tíu tơkăng kong dêi 3 kong pơlê.

Kĭ tơkêa Luât rak vế ngăn kong dêi 3 kong pơlê

Rak vế, pêi pro tiô Luât tơrŭm cheăng rak vế ngăn kong a kơpong achê tíu tơkăng kong mê 3 kong pơlê hiăng kĭ tơkêa, lối 2 hơnăm hiăng luâ, khu gak ngăn loăng pơlái kuăn kiâ kong dêi 3 kong pơlê hiăng lo lăm gak ngăn, seá ngăn, mơnhên ngăn lối 1 rơpâu 200 hdroh, tí tăng rup mâu khu ngế ki ko kếo ‘nhê kong, ƀă hiăng chêh bro hlá mơ-eá pơxâu phak 98 hdroh khu ngế pro xôi. Pôa Hồ Quang Bửu, Kăn phŏ hnê ngăn Vi ƀan hnê ngăn kong pơlê Quảng Nam vêh mơnhên, pơla hdrối kố nah, mâu khu rak ngăn loăng pơlái kuăn kiâ kong dêi 3 kong pơlê hiăng tơrŭm cheăng krá khât tung kring vế, rak ngăn kong achê tíu tơkăng pơla mâu kong pơlê.

A rôh hôp mê, 3 kong pơlê hiăng kĭ tơkêa Luât tơrŭm rak vế ngăn kong achê tíu tơkăng pơla mâu kong pơlê ƀă mâu hnoăng cheăng ki nhên vâ thăm mơdêk tung hnoăng rak vế ngăn kong tung la ngiâ.