Mơngế pêt kơphế a kong pơlê Kon Tum dế mot a hneăng rơnó krí hơnăm 2022 – 2023. Ƀă môi tiah mâu hơnăm hdrối, tơdroăng ôh tá tŭm mơngế krí pơtối ai nếo a tơring Đăk Hà, kơpong ki pêt hên kơphế dêi kong pơlê. Cho kơpong pêt kơphế kân má môi kong pơlê Kon Tum, tơring Đăk Hà ai lối 15.000 ha kơphế hiăng krí plâi. Vâ krí tâi ƀăng deăng kố, tơring kal lối 15.000 ngế pêi cheăng. Rơtế ƀă troăng krí sap ing tung dế khế 10 troh mơ’nui khế 12, tơring xuân pêi pro tơdroăng tăng mâu ngế pêi cheăng pơla mâu kơpong ƀă rak tơniăn châ dâng 11 rơpâu ngế pêi cheăng lăm krí kơphế.  

Ƀă lối 4.000 ngế pêi cheăng ối kal ăm rơnó krí kơphế hơnăm kố, khu râ kăn pơkuâ tơring Đăk Hà, kong pơlê Kon Tum rơtế mơhnhôk kuăn pơlê tí tăng mơngế pêi cheăng pa kong kong pơlê xuân hiăng hbrâ tơrŭm ƀă mâu kơ koan kŏng an, đông lêng vâ châ tŏng kum ‘na mơngế kum kuăn pơlê, khu tê mơdró krí kơphế tơniăn tung rơnó krí kơphế hơnăm kố.