VOV4.Xơ Đăng - Rôh kong mê ôh tá tro rơnó pơla hdrối kố nah a kơpong peăng tơdế Tơnêi têa ƀă Tây Nguyên hiăng pro tơ’nhiê hên kế tơmeăm. Laga, a kong pơlê Kon Tum kơnôm ai têa kong mê sap ing rôh kong mê kố hiăng kum ăm kơvâ pêi chiâk deăng a kong pơlê tơkâ luâ hneăng ki kong tô mơdrăng khăng khoăng má môi dêi rơnó tô Tây Nguyên. Tơdroăng tơbleăng sap ing tíu ki pơtâng tối hyôh kong prâi kong pơlê Kon Tum ăm hlo, tung roh kong mê ki ôh tá tro rơnó sap ing hâi lơ 31/3 troh lơ 1/4, a kong pơlê Kon Tum  hiăng ai kong mê krâ kơvâ, kong mê kân, ai tíu ki ‘nâ mê kân ó.

Rôh kong mêi ôh tá tro rơnó chiâng ai tơ’nôm têa ăm tơdroăng ki pêi chiâk klâng

Têa kong mê hiăng kum tôh kơchoh ăm môi hdroh tôh hdrê loăng pêt pơla rơnó tô mơdrăng, rôh kong mê kố ối mơdêk dâng 25% kơdró têa a 80 to long, rơchoâ, lối hrĭng to rơchoâ ƀă long têa hngêi kơmăi. Kố cho rôh kong mê ki ôh tá tro rơnó hiăng kum ai têa ăm tơdroăng ki pêi chiâk klâng dêi kong pơlê ƀă rơtế ƀă rôh kong mê nếo dế pro ai tŭm têa tôh ăm hdrê loăng pêt drêng rơnó kong mê hngê hơnăm 2022 hiăng pơxiâm vâ mêi.

Katarina Nga tơplôu ƀă tơbleăng