Thôn Đoàn Kết, cheăm A Yun Hạ, tơring Phú Thiện dế cho tíu tro lŭp ó má môi xua kong tô khăng khoăng. Hiăng ai lối 80 ha báu klâng khăng chếo tơ’lêi tro lŭp tâi. Drêng ai tơdroăng kố, Vi ƀan cheăm A Yun Hạ hiăng mơjiâng tôh tŏng kum rĕng, rơtế ƀă kuăn pơlê hbrâ mung rơxế kui tah trâp troăng têa plông Ia Ake ƀă xúa 21 têa klôh ki pong vâ hrik têa tôh loăng plâi. Vi ƀan tơring Phú Thiện xuân hiăng ai hlá mơ-éa tơbleăng pơtroh Vi ƀan kong pơlê Gia Lai ƀă mâu khu cheăng, kơvâ cheăng ki tơdjâk vâ pơkâ tŏng kum kơxô̆ liăn ăm cheăm vâ tăng têa tôh tơmeăm khoăng. Tơdrêng amê, pơkâ ‘na ton xŏn mơ’no liăn mơjiâng tíu hrik têa kơtâu ƀă on tơhrik ăm klâng kân thôn Đoàn Kết. Pôa Nguyễn Anh Tuấn, Kăn phŏ hnê ngăn Vi ƀan tơring Phú Thiện tối ăm ‘nâi:

"Ƀă tơdroăng kong tô khăng khoăng tung cheăm mê tơring hiăng hnê mơhno mâu kơ koan cheăng séa ngăn mâu ƀăng klâng chiâk kố ki kô khăng khoăng ƀă hiăng khăng khoăng vâ hnê mơhno ăm kuăn pơlê vâ tăng têa tôh tơmeăm ƀă tŏng mâu ƀăng deăng prá lâi tro tơdjâk. Hnê mơhno mâu cheăm séa ngăn, riân mâu tơmeăm tro lŭp, ing mê, ai troăng hơlâ tŏng kum tơmeăm tro lŭp xua kong tô khăng khoăng ƀă kuăn pơlê’’.

Khăng khoăng xuân pro ăm rơpâu rơpŏng kuăn pơlê rêh ối a cheăm tơkăng kong Ia Nan, tơring Đức Cơ, kong pơlê Gia Lai ôh tá ai têa tôh tơmeăm khoăng. Pôa Nguyễn Thanh Kiên, ối a thôn Đức Hưng, cheăm Ia Nan, tối ăm ‘nâi, kuăn pơlê thế prôk hơngế vâ pơto têa, rôe têa tíu ki ê vâ xúa ƀă kơxô̆ liăn kơnâ ó.

" 'Na têa ôu hum, rôh jiếo, tôh kế tơmeăm rêm hâi dêi rơpŏng á tối krê ƀă tâi tâng kuăn pơlê tung cheăm tối tơdjuôm cho pá puât, ‘na rơnó tô mê cho pái khế ôh tá ai têa xúa. Têa ki hnêng pơto vêh a hngêi vâ pế hmê, lơ xếo kơchâi klêi mê thế xếo ƀă têa kơthung, môi hâi xuân thế tâi dâng 3 kơthung têa’’.

Drêng tơdroăng kong tô khăng khoăng râ ó, pôa Nguyễn Chúc, Kăn phŏ Kơ koan xiâm, Kơ koan xiâm pơkuâ rơchôa têa Gia Lai tối ăm ‘nâi mâu troăng pêi dêi kong pơlê.

"Vâ hbrâ ví ƀă tơdroăng kong tô khăng khoăng ƀă ôh tá bê têa tôh tơmeăm tung pêi chiâk deăng mê ing kong pơlê troh tơring, cheăm xuân hiăng pêi pro mâu troăng vâ pêi pro mâu troăng hbrâ ví ăm tơtro ƀă tơdroăng nôkố vâ kơdroh tro lŭp ăm loăng plâi, kơjo ăm mâu loăng plâi ki kơnâ liăn kơdroh tro lŭp hên, tôh têa i iâ, athế kơdĭng‘măn hrái a xiâm loăng vâ tŏng mâu loăng plâi troh drêng hneăng krí xo. Xúa tâi tâng têa ki ai vâ tôh dêi mâu rơchôa têa vâ kum mơdêk châ tơƀrê tung tơdroăng tôh tơmeăm vâ tôh mâu ƀăng deăng loăng plâi ăm kuăn pơlê’’.

Pôa Lưu Trung Nghĩa, Kăn pơkuâ Khu pơkuâ ‘na pêi chiâk deăng ƀă Mơnhông thôn pơlê kong pơlê Gia Lai tối, drêng ai tơdroăng kong tô khăng khoăng rơdâ, tíu cheăng pơkâ mâu hngêi kơmăi on tơhrik mơ’no têa vâ tôh ăm loăng plâi.

"Tung khế 4 kố kong tô mơdrăng khăng khoăng ó, ngin tơrŭm ƀă Kŏng ti mơ’no on tơhrik 2 ƀă Kŏng ti on tơhrik An Khê - Ka Nak mơ’no têa chu a kơpong têa kroăng Pa vâ mâu cheăm hbrâ ai têa vâ tôh loăng plâi. Ngin xuân hiăng pâ thế Khu xiâm pơkuâ ‘na pêi chiâk deăng ƀă mơnhông thôn pơlê, Vi ƀan kong pơlê ing tơdroăng nôkố mê mơ’no liăn pêi kêi đeăng mâu hno têa dêi mâu tíu rơchôa, long têa hdoăng têa laga hno têa vâ mơ’no têa hiu ối iâ. Pơtối tơdroăng kố cho thế mơ’no liăn vâ pro mâu hno têa vâ rak tơniăn tôh têa tơ’lêi hlâu tâ, kơdĭng têa mê nếo tŏng kum ăm tơmeăm tro khăng khuô̆t dêi kong pơlê ƀă po rơdâ pêt mơjiâng’’.