Mâu hâi achê kố, a kong pơlê Dak Lak ai mâu rôh kong mêi ôh tá tro rơnó. Kong mê tung pơla hdrê loăng pêt dế pơxiâm tung rơnó vâ tơpo reăng kơ’muăn plâi pro hên kuăn pơlê tôu tuăn xâu tơdjâk troh ki kơtóu plâi ôh tá dâi, malối cho kơphế ƀă sầu riêng – cho hdrê plâi ki xiâm pro pơxúa liăn ngân hên dêi kong pơlê.

Hlo tơdroăng ki kong prâi ôh tá tơniăn môi tiah dế kố, kơvâ pêi chiâk deăng kong pơlê Dak Lak hnê tối mâu tơring, cheăm ƀă kuăn pơlê séa ngăn dêi klâng chiâk, hbrâ rơnáu mâu kế tơmeăm, pơkeăng vâ hbrâ ví ƀă mâu rôh kong mê pro tơdjâk troh hdrê loăng pêt. Ƀă mâu ƀăng tơnêi kơphế, sầu riêng dế tơpo reăng, kơ’muăn plâi tơtroh hbrâ mơdât mâu pơreăng môi tiah kâ ‘nhê tơkâng, pơreăng kâ ‘nhiê a plông loăng.

Nôkố, mâu kơ koan cheăng ki hbrâ rơnáu hnê ăm kuăn pơlê mâu troăng hơlâ kih thuât pêt rơkê vâ hbrâ ví ƀă tơdroăng ki kong tôu ton hâi, kơdroh iâ má môi tơdroăng ki tơdjâk troh ki dâi lĕm dêi kơphế ƀă plâi sầu riêng.