A deăng pêt pôm ló dêi cheăm Dak Ndrot, tơring Dak Mil, kong pơlê Dak Nông, tơdroăng pêi cheăng hơniâp ro, sôk suâ ‘nâng. Vâ chê 30 ngế pêi cheăng dế kơhnâ khât tung tơdroăng ki pêt pôm ló, idrâp tơpui, idrâp tó chuât rơtế ƀă idrâp kơmăi chuât, rơxế chuât. Ngoh Y Dap Kƀuôr, ối a ƀuôn Trắp B, cheăm Čư̆ Mgar, kong pơlê Dak Lak ai tối tiah kố, ngoh hiăng troh akố sap ing peăng kơxo vâ teăm lâk xo pôm ló a deăng ki kố.

“Vâ teăm lâk xo pôm ló, vâi krâ-nhŏng o ngin tơkŭm lo lăm lâk xo dêi pôm ló. Ngin hơniâp ro ‘nâng, ai tơdroăng cheăng châ pêi lo tơ’nôm liăn ngân apoăng rơnó hơngui”.

Xuân ai mâ ing kơxo má veăng lăm lâk pôm ló akố, jâ Lê Thị Lan, ối a cheăm Ea Drơng, tơring Čư̆ Mgar, kong pơlê Dak Lak hơniâp ro ó khât sap ing hâi ki apoăng lo lăm a deăng châ kăn pơkuâ deăng mê lì xì liăn ngân vâ xo pon mơhúa apoăng hơnăm.

“Tung hâi lo pêi cheăng ki apoăng hơnăm nếo, ngin lo lăm cheăng a deăng ki kố, ngin phiu ro ‘nâng. Hâi apoăng lăm pêi cheăng hiăng châ kăn pơkuâ ngăn deăng kố lì xì ăm, pói vâ tung hơnăm 2025 ai hên tơdroăng cheăng ki tơniăn”.

Pôa Lại Cao Điền, Kăn pơkuâ ngăn deăng ki kố tối ăm ngin ‘nâi, 7ha deăng pêt pôm ló Nhuk kố hiăng châ khu mơdró pâ rôe, péa pâ hiăng vâ môi tuăn, hdró hâi ki vâ chiân ăm vâi pôm loăng. Xua hiăng tơhrâ dêi pó hdrối, mê mơngế ki veăng lâk pôm ló ing Dak Lak hiăng tơkŭm kơto tơdjuôm rơxế troh vâ rĕng teăm lâk xo pôm ló, tơniăn hâi khế vâ pơtroh tơmeăm ăm khu mơdró kâ.

“Dế nôkố, yă tê pôm ló xuân hiăng to kơnâ iâ, xua mê, tơ-uân pơla chôu phut Têt, kong tôu lĕm, khu mơdró hiăng môi tuăn ƀă hiăng pơkâ ăm ngin tung hơnăm nah, ƀă yă ai 12 rơpâu liăn 1 kilô tâng rôe a deăng, tung mê, xuân hiăng hbrâ mơhá ăm hnoăng pêi, mơhnhôk, tŏng gum dêi pó. Roh Têt hơniâp ro rơnó Hơngui nếo kố la ôh ta la lâi piu hiât tơdroăng cheăng, mê troh a hâi má 4 Têt, ngin pơxiâm lo lâk pôm loăng, vâ teăm ai pôm pơtroh ăm kơ khu ki rôe”.

Mâu hâi ki kố, xuân cho roh ki hên kuăn pơlê pêi chiâk deăng mâu kong pơlê Tây Nguyên lo lăm dêi a kơdrum tôh kơphế, sầu riêng ƀă hên mâu hdrê loăng plâi ki ê. Dế tôh dêi 1 ha kơphế pêt tơvât ƀă plâi sầu riêng, pôa Vũ Văn Thắng, ối a pơlê kân Ea Tling, tơring Čư̆ Jut, kong pơlê Dak Nông ai tối tiah kố:

“To lâi hâi pơla hdrối kố nah, á xuân pơtê ối a hngêi, vâi krâ-nhŏng o hơnăm kố hơniâp ro, kâ têt tŭm têk kế tơmeăm. Hâi má 4 Têt kuăn pơlê ngin hiăng lo lăm tôh kơphế, tôh plâi sầu riêng, xuân pói rơhêng vâ yă tê tơmeăm xuân chía to kơnâ tiah kố, mơ’nui hơnăm mê vâi krâ-nhŏng o phiu ro, sôk suâ păng ‘nâng”.

Pôa Y Danh Niê, ối a ƀuôn Knia 3, cheăm Ea Bar, tơring Ƀuôn Đôn, kong pơlê Dak Lak xuân dế pơkrâ dêi klŏng ƀek vâ tôh kơphế. Pôa Y Danh tối ăm ‘nâi hiăng tôh roh apoăng ing hdrối hâi má 20 khế 12. Nốkố hiăng klêi kâ Têt mê reăng kơphế xuân hiăng khăng, tro klăng hâi ki tôh roh má 2. Klêi tôh kơphế mê rơpŏng kô pôe dêi báu ƀă a mơ’nui khế 1 mê pơtối châ krí xo dêi tiu.

“Hiăng tâi hâi leh Têt nôkố rơpŏng hngêi pơtối tơkŭm tôh têa ăm kơphế, tiu. Hơnăm kố, rơpŏng á pói tơngah kơdrum kơphế, kloăng tiu châ chiâng dâi lĕm vâ troh rơnó ah ga ai plâi kơtóu hên. Xuân pói rơhêng yă tê tơmeăm hơnăm kố châ tơniăn lĕm, tâk kơnâ hên tâ vâ tơdroăng rêh kâ ối dêi rơpŏng chía tơniăn tâ tâng vâ pơchông ngăn ƀă hơnăm hdrối nah”.

Klêi kơ’nâi mâu hâi hơniâp ro rơnó hơngui koh tơdah Têt, mơngế kuăn pơlê a kơpong Tây Nguyên pơtối tơkŭm pêi tơdroăng cheăng chiâk deăng. Tung pơla tơdroăng ki hơniâp ro a rơnó hơngui apoăng hơnăm, vâi krâ-nhŏng o pơrá pói rơhêng vâ môi hơnăm nếo pêi cheăng kâ tơ’lêi hlâu, kong mêi khía mơhot, pêi châ lo hên kế tơmeăm, yă tê tơmeăm châ tơniăn”.