Hdrối mê, a thôn 5 (cheăm Lộc Quảng ton nah), nôkố cho cheăm Bảo Lâm 1, kong pơlê Lâm Đồng ai tơdroăng khu chu dêi môi rơpŏng tro hlâ ƀă ai tơngê râ, lôi kâ, chôm. Kơ koan cheăng cheăm thâ khăm ngăn, klêi khăm ngăn mê khu chu kố yươ̆ng tĭnh ƀă virus pơreăng châi klêa chu châu Phi xua mê hiăng tơkŭm prâu tah tiô pơkâ hbrâ, mơdât pơreăng.

Lâm Đồng nôkố ai tâi tâng khu chu lối 1 rơtuh 300 rơpâu to. Vâ tơniăn tơdroăng hbrâ, mơdât châi klêa chu châu Phi, Viƀan kong pơlê Lâm Đồng pơkâ mâu khu, kơvâ cheăng ki tơdjâk ƀă Viƀan mâu cheăm, bêng, kơpong cheăng kâ tung kong pơlê hbrâ hnê mơhno, pêi pro kơtăng, tơdâng tơ’mô, ai xêt khata mâu troăng hbrâ, mơdât pơreăng; mơhnhôk tâi tâng mâu khu râ vâ tah lôi mâu pơreăng, ôh tá ăm tâ tú rơdâ. Mơ-éa dêi Viƀan kong pơlê tối nhên: Kăn hnê ngăn Viƀan mâu cheăm, bêng, kơpong cheăng kâ pôu râng hnoăng a ngiâ luât tâng ôh tá vâ tơmâng, lơ tơngôu, ôh tá pôu râng hnoăng cheăng tung pơkuâ, hnê mơhno lôi ai pơreăng châi klêa chu châu Phi xông tâ tú rơdâ, pro tro lup kân./.