Tiô Ƀơrô tơrŭm cheăng mơnhông pêi chiâk deăng krá tơniăn a Việt Nam, kơvâ plâi kơchâi hiăng châ pêi pro tơƀrê khât, kal kân veăng kum pêi lo hên kế tơmeăm ăm chiâk deăng tung mâu hơnăm hdrối mê hiá nah. Tâng môi tiah a hơnăm 2017, kơxô̆ liăn pêi lo ing pêi pêt, mơdró plâi kơchâi Việt Nam châ 3,6 rơtal dollars Mih, châ lối 10% kơxô̆ liăn ki mơ’no tê tơmeăm ing chiâk deăng, ká xi xŏng, bú riân krê 11 khế dêi hơnăm kố, liăn ngân ki tê mơdró plâi kơchâi mơni châ 3,1 rơtal dollars Mih, tâk châ 30% tâng vâ pơchông ƀă rơnó kố dêi hơnăm nah.

Troh nốkố, plâi kơchâi dêi Việt Nam hiăng châ tê troh 10 to kong têa ki kân má môi lâp plâi tơnêi, tung mê ai Sinuâ, Mih, Hàn Quốc ƀă Nhuk. Mâu rơkong tơpui tối tung heăng hôp mê ai tối nhên ‘na mâu tơdroăng ki pá puât tung tơrŭm pêi pêt, rak ‘măn, tê mơ’no, klêi mê, pơkâ thế ai troăng hơlâ vâ mơnhông kơvâ pêi pêt, tê mơdró plâi kơchâi Việt Nam pơla sap hơnăm 2022-2025, mâu hnoăng cheăng ki veăng kum pêi kâ ton xŏn ‘na chiâk deăng ƀă thôn pơlê krá tơniăn pơla hơnăm 2021-2030, hnoăng cheăng vâ pêi pro troh a hơnăm 2050 ki hiăng châ Ngế pro xiâm hnê ngăn Chin phuh kĭ pơkâ.