“Festival pơlê pêi cheăng dêi Việt Nam hơnăm 2022’’ pơxiâm po ƀă pêi 2 tơdroăng cheăng ki kal mê cho: Kơchơ pơlê ƀă tơmeăm pêi lo OCOP Việt Nam roh má 18 ƀă hneăng hôp pêi lo tơmeăm ƀă kŏng tơmeăm tĕn ƀă phêa, kơlá, rái hơnăm 2022. Ai 150 khu tơbleăng tê tơmeăm a Kơchơ pơlê ƀă tơmeăm pêi lo OCOP Việt Nam roh má 18 tơbleăng mâu tơmeăm pêi lo ing chiâk deăng, khu pêi cheăng tơrŭm, mâu tíu pêi pro, tê mơdró tơmeăm pêi lo ing chiâk deăng ƀă pơlê pêi pro mâu tơmeăm, kơphô̆ tiô hmâ ton nah sap 22 to kong pơlê, pơlê kong kân.  

Pôa Lê Minh Hoan, Ngế xiâm lăm ngăn mâu tơmeăm pêi pro ƀă kŏng

Xuân a Festival pơlê pêi cheăng dêi Việt Nam hơnăm 2022 hiăng po leh mơhá pri Khu tơ’noăng pêi pro tơmeăm ƀă kŏng teăn ƀă rái, phêa, kơlá hơnăm 2022 vâ ô eăng, mơhnhôk mâu khu ki hriăn pro cho mâu ngế ki pêi rơkê lo ing mâu pơlê pêi cheăng pro tơmeăm, kơphô̆ pro tơmeăm, ing mê veăng ‘no hnoăng pơtối rak vế mơdêk tơdroăng cheăng tiô ton nah dêi pơlê pêi cheăng, rak ngăn  ƀă pơtối rak vế khôi túa lĕm tro hdroâng kuăn ngo.