Tung 2 hâi, lơ 3 ƀă lơ 4/11 a pơlê kong kơdrâm Ƀuôn Ma Thuột, kong pơlê Dak Lak, Khu xiâm ngăn ‘na pơkeăng xôh kơdê nhâ loăng tơkŭm po hneăng hôp, Ngế xiâm ngăn ‘na chiâk deăng ƀă mơnhông thôn pơlê tơkŭm po hôp tơpui tơno ƀă hnê hriâm “mơdêk séa ngăn, tí tăng ngăn tơdroăng tê mơdró ƀă xúa pơkeăng xôh kơdê oâ, hdrong a Tây Nguyên’’. Ƀă tơdroăng veăng dêi kăn têa mâ ƀă kăn ƀô̆ Khu xiâm ngăn hdrê loăng ƀă rak hdrê nhâ loăng 5 to kong pơlê kơpong Tây Nguyên. Tiô tơdroăng ăm ‘nâi ing hneăng hôp, lâp Tây Nguyên nôkố ai dâng 3.400 tíu pêi cheăng, tê mơdró pơkeăng xôh kơdê ôa hdrong.

Tơdroăng cheăng rak ngăn pơkeăng xôh tơdê ôa hdrong nhâ loăng a Tây Nguyên châ tối hâi nhên khât, tơdroăng tơplâ mơdât mâu ki tê mơdró liu, chơ tơmeăm, xúa pơkeăng xôh kơdê nhâ loăng ing kong ê hmâng vâ, pakĭng inâi chêh tung mâu kong pơlê ối trâm hên xơpá.

A hneăng hôp, mâu kăn ai tối tiah kố, vâ mơdêk tơƀrê rak ngăn pơkeăng xôh kơdê nhâ loăng, kal tơrŭm ƀă pơla mau kơ koan, khu râ pơkuâ cheăng;  mơdêk hnê tối, tơbleăng hnê ăm kuăn pơlê hlê vâ pôi tá rôe xúa pơkeăng xôh pơkeăng ki mơdât. ôh tá ai tung inâi chêh ƀă hnê kuăn pơlê xúa tơniăn, tơƀrê.