Kơxê hâi lơ 27/10, a Hà Nội, Khu xiâm pơkuâ ‘na pêi chiâk deăng ƀă mơnhông thôn pơlê tơkŭm po hneăng hôp “Mơjiâng ki kơnâ kơvâ păn mơnăn mơnôa” veăng amê ai kăn teăng mâ 8 Khu tơrŭm cheăng, kơvâ cheăng ki tơdjâk. Kơvâ păn mơnăn mơnôa nôkố châ 25,2% tung tâi tâng ki kơnâ dêi kơvâ pêi chiâk deăng. Tung mâu hơnăm hiăng hluâ, kơvâ păn mơnăn mơnôa Việt Nam châ hên tơdroăng ki kal tâk ‘na pêi lo ƀă ‘na dâi lĕm pro xiâm kối ăm kơvâ păn mơnăn mơnôa tơmeăm khoăng mơnhông mơdêk ƀă tơdroăng ki veăng dêi hên khu tê mơdró kân, apoăng mơjiâng mâu tơdroăng tơrŭm tung pêt mơjiâng tơmeăm ƀă tê ngi kong têa ê tơmeăm pêi lo ing chiâk deăng.

Pôa Phùng Đức Tiến, Ngế xiâm phŏ pơkâ thế ôh tá lôi ăm Khu tơrŭm cheăng, khu tê mơdró ki lâi ối pa kong tơdroăng tơrŭm pro kơnâ dêi kơvâ păn mơnăn mơnôa

Pôa Nguyễn Thanh Sơn, Kăn hnê ngăn Khu pơkuâ păn mơnăn mơnôa, í peâp Việt Nam  tối, kal vêh séa ngăn tơdroăng tơrŭm pơla kơ koan pơkuâ tơnêi têa ƀă mâu Khu tơrŭm cheăng vâ tah lôi mâu tơdroăng pá puât, vâ pơkâ mâu troăng pêi la ngiâ mơjiâng rêm hngêi arak liăn tung tơdroăng tơrŭm ki kơbâ dêi kơvâ păn mơnăn mơnôa, tơtrŏng ki dâi lĕm dêi tơmeăm păn mơnăn mơnôa.

Rêm pâ ki tơdjâk kal ‘nâi ƀă dêi pó rêm khế, pro tơbleăng vâ tŏng kum khu tê mơdró teăm tơdrêng tah lôi mâu tơdroăng pá puât, thăm mơnhông rêm kơvâ tung kơvâ păn mơnăn mơnôa mơnhông mơdêk.