Nôkố lâp tơnêi têa ai dâng 448.00 ha kong pêt loăng kân, tâk rĕng tâng vâ pơchông ƀă hơnăm hdrối. Pakĭng mê hiăng ai dâng 63.000 ha kong châ pơ’lêh pêt ing kong loăng kŭn chiâng kong loăng kân ing mâu tơdroăng kơjo kum dêi Tơnêi têa hlối tơrŭm cheăng pơla tơnêi têa ƀă kuăn pơlê. Tơnêi pêt kong ai hlá mơ-éa mơnhên rak ngăn krá tơniăn vâ chê 943.000. Mơhé hiăng pơ’lêh mâu hlá mơ-éa mơnhên kong krá ton dêi lâp plâi tơnêi, hên tơdroăng xơpá dêi tơdroăng pêt kong pêi pro tơmeăm xuân ối mê cho pêi pêt iâ u tâi utá, kơxô̆ liăn mơnhên hên, ôh tá tơrŭm krá ki pơxúa, hnoăng râk ngăn hâi kâi ôh tá rơkê.

Pôa Nguyễn Danh Hùng, Phŏ Pơkuâ ngăn pêi chiâk ƀă Hyôh kong prâi Nghệ An, ăm ‘nâi: kong pơlê ai tơmeăm khoăng hên kơnôm ing tơnêi kong kân rơdâ, hên khu mơdró uâ pơliê pro tơmeăm ƀă loăng ƀă mâu khu pêi cheăng tơrŭm kơhnâ veăng pêi. Laga, tơnêi kong pêt loăng kân dêi Nghệ An xuân ối iâ  bú 33.000 ha. Tung la ngiâ, vâ mơdêk ki pơxúa dêi kong pêt, kong pơlê Nghệ An pơtối tơmâng khât troh pêt kong loăng kân:

“Kong pơlê pơkâ hdró, mơhno xoăng nhên kơpong ki lâi po rơdâ pêt kong loăng kân, vâ pêt kong, tơkŭm ƀă ai hlá mơnhên rak ngăn kong. Hô̆i đong kuăn pơlê dêi kong pơlê xuân hiăng ai pơkâ tŏng gum pêt kong kân, ki pơxiâm cho ing hdrê...”.

A rôh hôp, hên mâu ngế rơkê, khu rak ngăn, khu cheăng khoa hok tơbleăng hên troăng hơlâ vâ mơnhông pêt kong  krá tơniăn tơbrê. Ing mê, mâu troăng hơlâ xuân tơkŭm a pê klêi tro tiô luât, tơ’lêi hlâu hlá mơ-éa pro ai hlá mơ-éa mơnhên; ăm mung liăn, ai ƀaoh hiêm kong; kơjo kum hdrê pêt ki dâi lĕm mê cho loăng keo lai mô, keo tam bội; xúa kŏng ngê̆ kơxô̆ tung rak ngăn ƀă tăng xiâm ing lâi; mơnhông tơƀrê tơrŭm tê ton hơnăm ƀă yă tơniăn.

Ing tơdroăng tơdjêp ƀă kơjo kum hnê kih thuât, pôa Hoàng Văn Hồng, phŏ Pơkuâ Tíu xiâm Mơhnhôk pêi chiâk Tơnêi têa tối, kal thế mơdêk mơhnhôk rĕng pêt tơvât kong rơtế ƀă ai hlá mơ-éa mơnhên, hlối pro tâk tơrŭm rơpŏng kuăn pơlê - khu pêi cheăng tơrŭm- Khu mơdró - Khu mơnhên. Ing mê, Mơhnhôk pêi chiâk kô pơtối pro xiâm ki tơdjêp, gum mơngế ki pêt kong châ pêi cheăng ƀă kơmăi kơmok, pơkâ krá tơniăn ƀă kơxô̆ mơdró tơniăn.

“Tíu xiâm hnê mơhnhôk tơnêi têa xuân pơtối ƀă đi đo, mơdêk tơdroăng cheăng hnê tối, hriâm kih thuât pêt ăm kuăn pơlê. Mơjiâng mâu tơdroăng tơkêa bro hnê mơhnôk pêi chiâk vâ kuăn pơlê kô tối, ing mê vêh rơnêu, hriâm nếo, vâ po rơdâ mâu túa pêi chiâk pêt kong loăng kân krá tơniăn’’.

Hneăng hôp ôh tá xê tíu ki tơbleăng tối tuéa pêi cheăng, tăng troăng vâ tah ki xơpá mê ối po rôh mơdêk tơrŭm cheăng pơla mâu kong pơlê, khu mơdró ƀă mơngế ki pêt kong. Mâu troăng  pêi pro, tơhrâ ƀă hnê ăm kih thuât pêt  rak ngăn ing kơ koan rak ngăn, Khu mơhnhôk pêi chiâk kô pro xiâm ki nếo vâ po rơdâ ki kân kong pêt loăng kân rơtế ƀă ăm hlá mơnhên krá tơniăn, veăng ‘no hnoăng mơdêk ki pơxúa cheăng kâ, mơnhông cheăng kâ ƀă kring vế hyôh kong prâi.