VOV4.Xơ Đăng - A kơpong kong ngo, la ngế rơtăm Phạm Thế Hùng, 25 hơnăm, a cheăm Čư̆ Né, tơring Krông Ƀuk (Dak Lak) mê ƀlêi chiâng ƀă túa pơkâ păn ká Koi Nhuk. Nôkố, ngoh ai 3 tíu ki păn ká Koi rơdâ lối rơpâu met karê, liăn tơkâ châ lối 1 rơtal rêm hơnăm.

Tối ‘na tơdroăng pơxiâm tăng cheăng pêi, Phạm Thế Hùng, ối a cheăm Čư̆ Né, tơring Krông Ƀúk, hơ’muăn, klêi kơ’nâi mơgêi râ má pái phôh thong hơnăm 2015, teăng lăm hriâm đăi hok, á rah hriâm rơnêu rơxế hon đa klêi mê vêh po tíu rơnêu rơxế a hngêi. Hâk vâ phá tơ-ê ƀă ká Koi Nhuk, drêng toh chôu, o hmâ mot tung măng Internet tí tăng plĕng ‘na tơdroăng păn ká, klêi mê khên tơnôu tê rơxế honđa dêi tơná vâ rôe hdrê ká păn. Xua tá hâi ‘nâi nhên khât, péa khu ká apoăng pơrá hlâ tâi tâng.

Ôh tá préa, Hùng hiăng troh a mâu tíu păn ká a pơlê kong kân Hồ Chí Minh, Đồng Nai ƀă hiá hé vâ hriâm túa ki rơkê tơtro. Hiăng ‘nâi mâu tơdroăng ki kal tung păn, ngoh pơtê tơdroăng rơnêu rơxế, mơhnhôk nôu pâ mung hngêi arak liăn 120 rơtuh liăn vâ mơ’no liăn pro tíu păn ká Koi. Roh kố, kong hiăng kum ngế ki mơ-eăm, kơxô̆ ká xông kân lĕm ƀă ai kuăn tơdâng.

Nôkố rêm khế rơtăm kơphô̆ kong ngo Phạm Thế Hùng kô châ xo liăn tơkâ sap ing 50 – 100 rơtuh liăn ing ká Koi

Ngoh Phạm Thế Hùng tối, vâ păn ká Koi châ tơƀrê, ki xiâm cho têa thế krúa, kơpong pro tíu păn ká thế a’ngêi phuâng lĕm ƀă ai tíu phuâng ăm khía châ pê mot; ki rơhêng vâ tối thế hbrâ mơdât pơreăng kơmeăn a ká. Klêi kơ’nâi to lâi hơnăm pơxiâm tăng cheăng pêi, nôkố ngoh ai 3 tíu păn ká kân rơdâ 12.000 met karê a mâu kong pơlê Dak Lak, Kon Tum ƀă Lâm Đồng.

‘’Nôkố mê á tê đi đo rêm khế sap ing 5 tă troh 1 tâ̆n ká, riân kơxô̆ liăn mơ’no cheăng mê ối liăn rơkâ dâng 50 – 100 rơtuh liăn/khế. Tiô tơmiât pêi la ngiâ, á kô pro tơ’nôm plông, tíu păn ká Koi pro ăm lĕm mơnâ mâ ngăn, pro tíu tê kơphế ká Koi vâ tơmối troh ngăn, ƀă tâng rôe mê pêi hlối vâ mơdêk pêi lo liăn. Mơjiâng pro mâu klôh ká, têa long’’.

Túa pơxiâm tăng cheăng pêi păn ká Koi châ tơƀrê dêi Phạm Thế Hùng hiăng ƀă dế cho tơdroăng ki mơhnhôk ăm droh rơtăm tơring thăm vâ pơxiâm tăng cheăng pêi

Ing châ tơƀrê dêi tơná, nôkố Phạm Thế Hùng ôh tá xê to tăng cheăng pêi ăm mâu droh rơtăm, mê ối hbrâ hnê mơhno kum ăm mâu pú hơnăm ối nếo pêi tiô tơná. Nguyễn An Khánh, ối a thôn Katy 5, cheăm Čư Né, tơring Krông Ƀúk, tối.

‘’Pêi cheăng ƀă ngoh Hùng mê ngoh mơhá liăn khế 4 – 5 rơtuh liăn môi khế. Á dế mơ’no liăn pro tiú păn, kuâ ƀă kơmăi pro têa kơnăm ƀă hía hé, mơ’nui khế 4/2022 kố kô pơxiâm po tíu tê ká Koi dêi á. Tâi tâng kơxô̆ liăn mơ’no dâng 100 rơtuh liăn, ƀă á ai mung liăn nôu pâ dâng 70 rơtuh liăn, kơxô̆ ki ê ngoh Hùng ăm mung ôh tá xo liăn rơkê. Tâng ôh tá tŭm kơxô̆ liăn xếo ngoh tơkêa kô tê ăm che\n ká hdrê ƀă tâk ăm ká kâ, kô chêl ăm ngoh chôa ‘lâng kơ’nâi xuân hôm’’.

Tiô ngoh Võ Minh Cường – Kăn phŏ hnê ngăn Khu pơkuâ Droh rơtăm Việt Nam tơring Krông Ƀúk, păn ká Koi mê cho troăng prôk nếo a kơpong kong ngo  laga hiăng châ tơƀrê hên. Tơdroăng kố kum mơhnhôk ăm hiâm mơno hâk vâ tăng cheăng pêi rơkê dêi hên ngế droh rơtăm a tơring.

‘’Kâu lăk ƀô̆ droh rơtăm pơxiâm tăng cheăng pêi tơring Krông Ƀúk dế mơjiâng hên troăng pêi rơkê lơ mâu tíu păn ká Koi Dak Lak xua Phạm Thế Hùng tŏng kum. Ing mê, kum hnê cheăng pêi tê kơtê ƀă hnê mơhno mơjiâng troăng tăng cheăng pêi ăm mâu khu tơrŭm ki ê. Ing kố, ngin kô mơjiâng mâu Kâu lăk ƀô̆ kân tâ mê troăng tơrŭm cheăng ƀă kơvâ hnê cheăng pêi nếo, tăng cheăng pêi ăm droh rơtăm tơring xuân môi tiah pêi lo liăn vâ tŏng kum rơpŏng ƀă mâu pú hmâ hơnăm ối nếo’’.

Tuấn Long chêh

A Sa Ly tơplôu ƀă tơbleăng