Vi ƀan tơring Phú Thiện hiăng ai mơ-éa pâ thế Vi ƀan kong pơlê Gia Lai krếo thế mâu khu tê mơdró rôe pôm ló kum kuăn pơlê tơkâ hluâ pá puât. A tơring Phú Thiện, nôkố ai lối 3.440 ha, pêi lo tiô tối hdrối châ dâng 68.800 tâ̆n, hiăng lâk châ dâng 60% ƀăng deăng.

Sap apoăng rơnó lâk troh nôkố, yă pôm ló chu rơpâ. Ki nhên, sap ing kơlo 10.000 liăn/ki lô, yă đi đo kơdroh chu u ối 3.500 liăn/kilô nôkố. Yă chu rơpâ, khu tê mơdró rôe pơtê tơdế rá pro kuăn pơlê pêt pôm ló pá puât. Mơ’nui hơnăm nah, Ƀơrô pêi chiâk deăng ƀă mơnhông thôn pơlê tơring Phú Thiện hiăng séa ngăn ƀă hlo ƀăng deăng pôm ló a kong pơlê tâk hên tâ hơnăm hdrối dâng 1 rơpâu ha, ƀă hiăng pơchân tối tơdroăng po rơdâ ƀăng deăng laga ôh tá ai tíu tê tơniăn pro mơngế pêt pôm ló tro lŭp drêng mot a rơnó lâk pôm.