Ki vâ tối, kơ’nâi 6 hơnăm mơnhông tơƀrê mâu tơmeăm OCOP, troh rôh séa ngăn vâ rah xo, Dak Lak nếo ai 2 tơmeăm ki apoăng ai tŭm tiô pơkâ ăm veăng séa ngăn vâ pơxá OCOP 5 hơlŏng (râ tơnêi têa), cho kơphế kơchiâk Kiên Cường dêi Kŏng ti Pêi cheăng tiô rơnó Môi tung khu Kiên Cường, pơlê kong kơdrâm Ƀuôn Ma Thuột ƀă Kloăng Mắc-ca Dak Lak ki lĕm dêi Kŏng ti veăng tơlo liăn ki apoăng dêi kong pơlê Dak Lak veăng tối pơxá má to lâi dêi tơmeăm OCOP râ tơnêi têa hơnăm kố, mơhno ki mơ-eăm dêi kong pơlê tung tơdroăng mơdêk ki pơxúa ƀă tơbleăng tơmeăm OCOP troh hên khu mơdró tung tơnêi têa ƀă kong têa ê.

Hô̆i đong tối khĕn kơdeăn, klâ pơxá túa tơmeăm OCOP kong pơlê Dak Lak rôh má 1 hơnăm 2024

Luâ 6 hơnăm pêi pro Tơdroăng rêm cheăm môi tơmeăm rơtế ƀă mơjiâng thôn pơlê nếo, troh nôkố, kong pơlê Dak Lak hiăng ai 237 tơmeăm châ mơnhên OCOP. Hơnăm 2024, Hô̆i đong OCOP râ kong pơlê kô tối, klâ pơxá túa ăm 44 tơmeăm ki 4 hơlŏng xua kong pơlê pâ thế.