Peăng xêi hâi lơ 2/12, a pơlê kong kơdrâm Kon Tum, Khu xiâm hnê mơhnhôk pêi chiâk deăng tơnêi têa tơrŭm ƀă Khu hnê mơhno ‘na chiâk deăng ƀă mơnhông thôn pơlê dêi kong pơlê Kon Tum tơkŭm po hneăng trâm mâ, tơpui tơno dó inâi: “Tơpui tơno mâu tơdroăng rơkê tung mơjiâng hnoăng cheăng dêi Khu hnê mơhnhôk pêi chiâk deăng pơlê pơla a kong pơlê Kon Tum”. Veăng ai mâ a hâi hôp mê, ai mâu ngế ki hriăn rơkê, mâu ngế pơkuâ ngăn, mâu kăn, teăng mâ mâu khu râ, kơvâ cheăng ƀă Khu hnê mơhnhôk pêi chiâk deăng  dêi 2 kong pơlê Kon Tum prế Gia Lai. Vâ mâu khu hnê mơhnhôk pêi chiâk deăng pơlê pơla pêi cheăng châ tơƀrê, a Hneăng hôp mê, mâu kăn dêi 2 kong pơlê Gia Lai ƀă Kon Tum hiăng rơtế tơpui tơno, mơnhên mâu tơdroăng, hnoăng cheăng dêi Khu hnê mơhnhôk pêi chiâk deăng.

Veăng tơpui tối, hnê khĕn mâu tơdroăng cheăng ki nhên ăm Khu hnê mơhnhôk pêi chiâk deăng pơlê pola, mê ai: Hnê mơhno tối, hnê pơcháu ki rơkê plĕng dêi kih thuât nếo ăm mâu hdroâng kuăn pơlê vâ mơnhông pêi chiâk deăng; Mâu tơdroăng ki tŏng kum, hnê mơhno vâ mơnhông Tơrŭm cheăng chiâk deăng; Mâu tơdroăng ki tŏng kum, hnê mơhno ‘na hơ’lêh kơxô̆ tung pêi chiâk pêi deăng.