Kố cho hnoăng cheăng xiâm châ tối a hneăng hôp Khu pơkuâ kơvâ kơphế tiah hmâ rêm hơnăm 2022 xua Kơ koan xiâm Pơkâ troăng hơlâ ƀă troăng pêi ton xŏn mơnhông pêi chiâk deăng thôn pơlê tơrŭm ƀă Kơ koan xiâm pơkuâ pêt tơmeăm, Khu xiâm pơkuâ ‘na pêi chiâk deăng ƀă Mơnhông thôn pơlê tơkŭm po hâi lơ 26/10, a kong pơlê Dak Lak.

Klêi kơ’nâi vâ chê 10 hơnăm pêi cheăng, Khu pơkuâ kơvâ cheăng kơphế Việt Nam kum thăm pêi pro rĕng tơdroăng ki lak tah lôi ƀăng kơphế ki hiăng krâ pêi lo liăn vâ vêh pêt kơphế ki nếo, pêi chiâk deăng krá tơniăn ing tơdroăng kơphế pro lĕm mơnâ mâ ngăn, mơdêk ki kơnâ kơphế ing tơdroăng tơkêa bro kơphế xú hŏm lĕm.

Pêt mơjiâng kơphế châ tiô pơkâ kơphế xú hŏm lĕm

A hneăng hôp, mâu kăn hiăng tơkŭm tơpui tơno, tối ăm dêi pó, kum mâu troăng tơmiât pêi rơkê tung mơnhông pêi kơphế Việt Nam krá tơniăn tung la ngiâ. Khu pơkuâ kơvâ kơphế Việt Nam hiăng tơbleăng ăm pêi pro tơdroăng pêi cheăng hơnăm 2023, tơkŭm kơjo vêh pêt kơphế ƀă pêt mơjiâng kơphế xú hŏm lĕm vâ châ pơkâ troh hơnăm 2025, kô ai 107 rơpâu ha kơphế vêh pêt ƀă 11.500 ha kơphế ki xú hŏm lĕm ƀă pêi lo châ 5 rơpâu tâ̆n.