Hâi lơ 5/2., Kŏng ti tơlo liăn cheăng Banana Brothers Farm, tơring MDrak, kong pơlê Dak Lak pro leh mơ’no tê kế tơmeăm ai 5 container, châ 100 tâ̆n priât troh a kong têa Sinuâ ƀă Hàn Quốc. Jâ Lê Thị Mỹ Hạnh, Kăn hnê ngăn Kŏng ti tối ăm ‘nâi, hơnăm nah, Kŏng ti hiăng mơ’no tê lối 10.000 tâ̆n priât troh mâu kong têa Hàn Quốc, Sinuâ, Nhuk, Mông Cổ ƀă hên hĕng mâu kong têa ê. Hơnăm kố, Kŏng ti kô po rơdâ tơ’nôm dâng 500 ha vâ pơtối po rơdâ chiâk deăng pêt kơphế ƀă tơngah kô châ tê mơ’no hên a mâu kong têa ki ê:

“Tung hơnăm 2025, ngin pói rơhêng vâ po rơdâ tơ’nôm chiâk deăng ki nếo ƀă thăm mơdêk tơdroăng pêi lo priât hên tâ troh a mâu kong têa ki vâ rôe kâ ƀă hên tâ kơ mê nếo tung la ngiâ, xua tơdroăng pói rơhêng vâ dêi mơngế ki rôe kâ rêm hâi rế hía rế hên”.

Ƀă Kŏng ti tơlo liăn cheăng tiô rơnó Ban Mê Green Farm, pơlê kong kơdrâm Ƀuôn Ma Thuột, kong pơlê Dak Lak, sap ing apoăng hơnăm 2025, hiăng kĭ tơkêa mâu tơdroăng ki tơkêa pêi ƀă kĭ tơhrâ ƀă mâu tơdroăng ki tơrŭm cheăng pơto chơ lối 100 container plâi sầu riêng, tơdâng ƀă lối 2.700 tâ̆n hni plâi sầu riêng ki hiăng tâ tung kơtuh hngíu vâ tê mơ’no troh a kong têa ê. Pôa Nguyễn Văn Công, Kăn pơkuâ ngăn Kŏng ti tối ăm ‘nâi:

“Hơnăm 2025 hiăng châ pêi pro mâu tơdroăng cheăng ki ai pơxúa kân khât, tơkéa vâ tối, hên mâu kong têa hiăng kĭ tơkêa vâ rôe tơmeăm ing hngêi kơmăi ƀă 1 kŏng ti dế pơkâ athế pêi pro mâu hnoăng cheăng vâ tơdjêp troh tơdroăng ki po rơdâ tơ’nôm hngêi kơmăi ki vâ po rơdâ tơ’nôm mâu hngêi kơmăi ƀă mâu hnôu ki tơrŭm cheăng ki ê”.

Ai môi tơdroăng ki hơniâp ro ki ê nếo tung tơdroăng mơ’no tê kế tơmeăm pêi lo ing chiâk deăng a Dak Lak cho kơpong kơphế ki dâi lĕm khât, kơphế ki xú hŏm lĕm châ mâu kong têa ê tung lâp plâi tơnêi rơhêng vâ tí tăng rôe. Pakĭng mâu kloăng kơphế ki mơ’no tê nếo têng khăng, mâu tơmeăm kơphế ki châ mơjiâng pro dêi kong pơlê xuân chôa ‘lâng châ mơnhên mâu tơdroăng ki vâ mơnhên dêi hnoăng cheăng tơná châ tê mơ’no troh a hên mâu kong têa tung lâp plâi tơnêi ƀă hên kong têa ki ê. Tung mê, ai mâu hngêi kơchơ ki preăng rơhêng vâ rôe hên, lơ tăng pơrah kơtăng ó má môi, môi tiah mâu kong têa: Mih, Nhuk. Hàn Quốc, châu Âu ƀă hên hĕng mâu kong têa ê. Pôa Lê Đình Tư, kăn hnê ngăn Kŏng ti tolo liăn cheăng môi tung khu cheăng Minodo Farm Care, pơlê kong kơdrâm Ƀuôn Ma Thuột tối ăm ‘nâi: hơnăm 2025 pơtối tơkêa cho môi tung môi hơnăm ki vâ mơnhông hơngế tâ dêi khu pơkuâ ngăn ‘na tơmeăm pêi lo ing chiâk deăng dêi kong pơlê Dak Lak tâng châ mơ’no liăn, tŏng gum tro tơdroăng mê.

“Mâu hngêi mơdró ki uâ mơdiê tơmeăm khoăng ƀă mơdiê kơphế ki dâi khât, ki ahdrối tâ athế ai tơdroăng ki châ tŏng gum ‘na liăn ngân. Ki má péa nếo, mê cho liăn ngân vâ pơhlêh ‘ná cheăng kơmăi kơmok, marketing veăng mâi roh po kơchơ lâp plâi tơnêi la mơ’no liăn hên ‘nâng, ai tá tơdroăng ki veăng gum ing tơnêi têa troh a mâu kong pơlê”.

Pôa Nguyễn Hoài Dương, Kăn hnê ngăn ‘na Chiâk deăng ƀă Mơnhông thôn pơlê, kong pơlê Dak Lak tối ăm ‘nâi: Hơnăm 2025, kong pơlê pơtối tơkŭm thăm mơdêk kế tơmeăm pêi lo ing chiâk deăng, tơtro tiô kloăng kơphế, tơpoăng kơphế ki tơxâng vâ châ tê mơ’no troh hên mâu kong têa ê.

“Ngin hiăng tŏng gum ngăn khât ƀă pro tơ’lêi hlâu vâ mâu khu mơdró kâ mơ’no liăn cheăng tơkŭm, tơdjuôm, ai hlá mơ-eá mơnhên, ai inâi ƀă châ tơbriât tê dêi kơphế troh a mâu kong têa ê. Ki rơhêng vâ tối, mâu hngêi kơchơ ki rôe châ dâi lĕm khât, rế hiá rế pá tung tơdroăng ki pá puât ‘na kế tơmeăm. Mê cho roh ki vâ thăm mơdêk ki kơnía dêi tơmeăm pêi lo ing chiâk deăng a Dak Lak tối krê. Tây Nguyên tối tơdjuôm”.

Ƀă mâu tơmeăm khoăng ki ai hlâu ƀă tơdroăng kơdo mơ-eăm đi đo dêi mâu khu mơdró kâ, pói rơhêng vâ troh hơnăm 2025, tơmeăm pêi lo ing chiâk deăng dêi kong pơlê Dak Lak pơtối mơdêk inâi tơmeăm mơdró, po rơdâ tơdroăng tê mơ’no troh mâu kong têa ê vâ tơdroăng pêi cheăng kâ châ tơƀrê ƀă tơtêk hên tâ. Tơdroăng kố veăng gum thăm mơdêk pêi lo liăn ngân ăm tơná kuăn pơlê, khu mơdró kâ ƀă thăm mơdêk mơnhông cheăng kâ, pêi lo kế tơmeăm, mơnhông rêh ối pơlê pơla, ing mê, vâ khoh pêi lo kơxô̆ liăn tâk tơ’nôm 2 to kơxô̆ pá rŏng hên tâ a la ngiâ.