Kong pơlê Dak Lak nôkố dế ai dâng 41.000 ha plâi sầu riêng, tiô tơdroăng ki tối ahdrối hơnăm kố kô châ dâng 400.000 tâ̆n, tâk hên tâ tâng vâ pơchông ngăn ƀă hơnăm nah. Kơxô̆ plâi ki krí mê ga hên ó khât, xua ga, hên kơpong ki pêt plâi sầu riêng a mâu kong pơlê ki ối tâ tá dế trâm pá, xua ôh ta vâ rôe xếo, xua plâi sâu riêng  ôh ta dâi, ing mê, pro tơdjâk troh tơdroăng ki loi tơngah dêi mâu khu ki tơrŭm tê rôe. Jâ Nguyễn Thị Thành Thực, Kăn hnê ngăn Hô̆i đong Kuan trĭ Kŏng ti AutoAgri tối tiah kố, plâi sầu riêng Dak Lak ối ai hên tơnêi tíu, chiâk deăng vâ po rơdâ pêt loăng plâi sầu riêng, khu kăn pơkuâ ƀă kơvâ kal athế tŏng gum ‘na mah kơxô̆ ăm kơpong ki pêt:

“Mah kơxô̆ kơpong ki pêt cho vâ tối a tíu xiâm dêi tơmeăm khoăng dêi mơngế ki pêt mơjiâng, laga, hiăng ai hên khu mơdró kâ hiăng tơbriât xo inâi mah kơxô̆ ki pêt mê pro chiâng ‘mêi, ing mê, pro peăng kong têa Sinuâ vâi pơtê tơdroăng rôe plâi ki pin, ing mê, pin kô tro lŭp xêh. Á pâ thế khu kăn pơkuâ kong pơlê, mâu khu râ, kơvâ cheăng athế mơjiâng hnoăng cheăng tung môi hơnăm athế tơleăng mơnhên, mơjiâng mơnhên mah kơxô̆ a kơpong ki pêt mơjiâng plâi sầu riêng mê”.

Khu ngăn ‘na Chiâk deăng ƀă Hyôh kong prâi kong pơlê Dak Lak hiăng tơrŭm cheăng ƀă Khu xiâm tơrŭm mơdró plâi sầu riêng ƀă mâu khu mơdró kâ, khu pêi cheăng tơrŭm, hiăng thăm mơdêk séa mơnhên ngăn ki dâi lĕm dêi plâi, xo châ plâi vâ mơnhên ngăn ki ai trếo ki klâi, tơkêa ôh tá dâi mâu trếo ki tro mơdât, ki rơhêng vâ tối, séa mơnhên ngăn kơtăng khât, khŏm mơdât, tah lôi trếo vàng ô ƀă cadimi. Pôa Lê Anh Trung-Kăn hnê ngăn Khu tơrŭm tê mơdró plâi sầu riêng Dak Lak tối ăm ngin ‘nâi:

“Khu tơrŭm cheăng hiăng rơtế ƀă mâu tíu xiâm hriăn plĕng ƀă mâu khu mơdró kâ, khu pêi cheăng tơrŭm vâ xo châ plâi sầu riêng mơnhên ngăn kơpong tơnêi ki pêt mơjiâng a Dak Lak cho tơniăn lĕm, ing mê, pro tiu ki loi tơngah vâ ai roh tơrŭm tung tê mơdró kâ pơla sầu riêng Việt Nam ƀă mơ’no tê troh a kong têa ê. Tung pơla “cheăng kâ tơ’lêi hlâu” ngin dế hnê mơhno mâu khu mơdró kâ tơrŭm cheăng ƀă Khu ngăn ‘na rak ngăn hdrê loăng mơjiâng khu xiâm châm điêm vâ mơnhên ngăn xiâm kối dêi plâi pêt cho tro tơdroăng ga. Ing mê, kô kơdroh tơdroăng ki ai tơdjâk troh séa ngăn, tí tăng mơnhên ngăn. Ing mê, chôu phut, hâi khế ki vâ tơrŭm mơ’no tê rôe plâi xuân tơ’lêi hlâu tâ”.

Khu tơrŭm ngăn ‘na tơdroăng cheăng kố hiăng hnê tối kuăn pơlê mâ tá krí plâi drêng ối kơbâng, mê athế krí plâi ki hiăng tum ‘nâng, vâ pôi ta tro khu mơdró kâ lơ hjip yă lơ ôh tá ai khu ki vâ rôe. Mâu khu mơdró, khu pêi cheăng tơrŭm hiăng pơkâ thế tơkêa rak vế, pêi pro tro khât mâu tơdroăng ki tơniăn, túa ki kơxu tâ tung tơdrong, ai liăn ngân vâ tah lôi tơdroăng ki vâi hiăng kok liăn ahdrối, ah pro lŭp ăm kuăn pơlê.

Vâ plâi sầu riêng Dak Lak pơtối châ mơ’no tê tơxâng ƀă mâu kong têa vâi ê tung lâp plâi tơnêi, mê kal athế pêi pro tơdâng, adrêng ing tơdroăng mơdâ pêt, rak ngăn, pro tro tiô kih thuât, mơnhên tối xiâm rêi tơnêi ki pêi pêt mơjiâng ta troh a séa mơnhên, rak ngăn, tâ ‘măn, ta troh a roh ki tê mơdró. Khu kăn hnê ngăn, khu mơdró ƀă kuăn pơlê ki pêt athế tơdjuôm ivá mơjiâng kơvâ cheăng ki tê mơdró plâi sầu riêng ki păng ‘nâng, krá tơniăn, tŭm ivá vâ châ tơbriât mơ’no tê plâi tung lâp plâi tơnêi. Ƀă tơdroăng ki rơtế tŏng gum dêi khu kăn hnê ngăn ƀă kơvâ cheăng, tơdroăng ki kơdo mơ-eăm dêi kuăn pơlê ƀă khu mơdró, Dak Lak dế khŏm mơ-eăm rak vế krá tơniăn inâi plâi sầu riêng tơniăn, chôa ‘lâng po rơdâ tíu ki vâ tê mơdró, veăng gum mơnhên tơniăn inâi plâi sầu riêng Việt Nam tung lơgât dêi tơmeăm ki mơ’no tê mê.