VOV4.Sêdang - Kơxo lơ 2/7, a Hà Nội, po hneăng hôp mơ’no tơdrêng tung lâp tơnêi têa mơgêi tơdroăng cheăng pêi 6 khế apoăng hơnăm ƀă tơbleăng tơdroăng cheăng pêi 6 khế mơ’nui hơnăm dêi kơvâ ngăn cheăng pêi. Jâ Phạm Thị Thanh Trà, Ngế xiâm ngăn cheăng pêi pơkuâ hneăng hôp. 6 khế hdrối nah, kơvâ ngăn cheăng pêi hiăng hbrâ tí tăng ‘nâi plĕng veăng tối nhên a tơdroăng tơ-brê dêi hneăng tâ phĭu rah xo Kăn Kuô̆k hô̆i hneăng 15 ƀă mâu kăn Hô̆i đong rêm râ hneăng 2021-2026, ôh tá la lâi pơtê mơ-eăm pơ’lêh nếo tơdroăng, troăng hơlâ pơkuâ, rak ngăn kơvâ, veăng tơmâng pêi tiô pơkâ hneăng hôp má 13 dêi Đảng ƀă hneăng hôp mâu Đảng ƀộ kong pơlê.

A rôh hôp, teăng mâ Khu xiâm ngăn cheăng pêi kong pơlê, pơlê kong kơdrâm tơpui tơno ‘na mâu tơdroăng xơpá, tơvâ tơvân tung tơbleăng mâu pơkâ dêi Chin phuh ‘na tơdroăng cheăng pêi, ƀiên chế mâu kăn, kơxô̆ mâu ngế pêi cheăng; xing xoăng ngăn a khu kăn cheăng dêi mâu tíu pêi cheăng dêi tơnêi têa... Mâu kăn thế, Khu xiâm ngăn cheăng pêi ai hlá mơ-eá hnê nhên tâ nếo vâ mâu kong pơlê, khu xiâm kơvâ cheăng tơbleăng pêi pro.

Tơpui mơgêi a hneăng hôp, jâ Phạm Thị Thanh Trà, Ngế xiâm pơkuâ ngăn cheăng pêi thế: mâu khế mơ’nui hơnăm,, Khu ngăn cheăng pêi mâu kong pơlê, pơlê kong kơdrâm kal thế séa ngăn pêi pro tro mâu tơdroăng pơkâ Hneăng hôp má 13 dêi Đảng, dêi Khu xiâm ngăn cheăng pêi, mâu kong pơlê vâ pơ’lêh nếo tơdroăng tơbleăng pêi, tơmâng mâu tíu pêi cheăng tối, đi đo tối dêi rơpó ‘nâi mâu tơdroăng khu pơkuâ ngăn cheăng pêi vâ ai troăng hơlâ tơleăng mơnhên.

Gương tơplôu ƀă tơbleăng