VOV4.Xơ Đăng - Kơmăng lơ 7/1, a pơlê kong kơdrâm Vĩnh Long, kong pơlê Vĩnh Long, Khu xiâm pơkuâ kuăn pơlê pêi chiâk deăng Việt Nam, Khu xiâm pơkuâ ‘na pêi chiâk deăng ƀă mơnhông mơdêk thôn pơlê ƀă Vi ƀan kong pơlê Vĩnh Long tơrŭm tơkŭm po leh pơxiâm po Festival báu pháu Việt Nam roh má V hơnăm 2021 ƀă veăng amê ai hrĭng tơmeăm ƀă mâu tơmeăm ki lĕm má môi.

Xông tơpui pơxiâm po leh, pôa Lương Quốc Đoàn, Kăn cheăng tung Tíu xiâm Đảng, Kăn hnê ngăn Khu pơkuâ kuăn pơlê pêi chiâk deăng Việt Nam tối ăm ‘nâi, klêi kơ’nâi lối 35 hơnăm pêi pro troăng hơlâ pơ’lêh nếo, ki má lối cho klêi kơ’nâi 13 hơnăm pêi pro pơkâ 26 Hneăng hôp roh má 7, Khu xiâm Đảng hneăng má X ‘na pêi chiâk deăng, kuăn pơlê pêi chiâk deăng, thôn pơlê, kơvâ pêi chiâk deăng ƀă cheăng kâ thôn pơlê tơnêi têa pin hiăng châ tơƀrê hên.

Kăn cheăng tung Tíu xiâm Đảng, Kăn hnê ngăn Khu pơkuâ kuăn pơlê pêi chiâk deăng Việt Nam tơpui a roh po Festival báu phái

Festival cho roh vâ mâu khu tê mơdró châ trâm mâ tơbleăng rơdâ tơmeăm dêi tơná, ti tăng khu tơrŭm, mơnhông mơdêk kơvâ kơmăi kơmok uâ mơdiê tơmeăm pêi lo ing chiâk deăng a  kong pơlê ƀă kơpong tơbăng kroăng Cửu Long; tŏng kum mâu khu tê mơdró, kuăn pơlê pêi chiâk deăng châ tơƀrê ƀă pơkuâ kơvâ báu pháu Việt Nam xuân môi tiah mâu inâi tơmeăm pêi lo ing chiâk deăng ai tiú tê, mơdêk ivá tơbriât cheăng tung lâp plâi tơnêi.

A Sa Ly tơplôu ƀă tơbleăng