VOV4.Sêdang - Tung tơdroăng rêh ối rêm hâi, mâu tơmeăm dâi, môi tiah: pơtâk, ếo, ếo ‘ngrôa ƀă hên hĕng mâu tơmeăm dâi ki ê ki tĕn pro ing mâu prế, kơpê dêi Tây Nguyên hiăng châ hên hĕng kuăn pơlê, mâu nhŏng o ki achê, hơngế rôe dâi. Cho kơpong ki xúa hên mâu tơmeăm ki hên mơngiơk, môi tiah Gia Lai, tơdroăng ki mơ’no tối thế môi hâi pơ-ôu pơ-eăng mâu tơmeăm dâi dêi hdroâng kuăn ngo Jarai, Bơhnéa xuân cho tơdroăng ki xiâm vâ veăng kum mơnhông tơdroăng tĕn tơmeăm dâi tối krê ƀă tơdroăng cheăng tiô khôi hmâ roh nah tối tơchôam.

Tung mâu hơnăm hdrối mê hía nah, tung hlá tơbeăng, rơjíu, um tơvi ai hên ƀai chêh tối ‘na mâu ngế krê, malối cho khu vâi hdrêng tŏng kum ngăn khât troh tơdroăng rak vế, pơtối mơdêk ki kơnía mơhno túa lĕm tro dêi hdroâng kuăn ngo Jarai, Bơhnéa kơnôm ing tơdroăng thăm mơdêk ki kơnía dêi ếo pơtâk hdroâng kuăn ngo. Môi tiah nâ Rơmah H’Tuyết, ôh a tôh kơphô̆ 10, pơlê kân Phú Thiện, kong pơlê Gia Lai hiăng hmâ tĕn, pơchoh ếo pơtâk dêi hdroâng kuăn ngo ai hên túa, hên vêa. Thái hnê chư, inâi Tưih, ối a pơlê Dur, cheăm Glar, tơring Đăk Đoa, kong pơlê Gia lai ƀă hiâm mơno tơná hiăng kơhnâ khât tung hnoăng cheăng pơtối rak vế mơhno túa lĕm tro dêi tơná, thái hiăng tơmiât, hriăn plĕng ‘na mâu khu pơtâk pơkoăng ŏng mế, pơtâk vâ xah hêi, ngăn mâu pơtâk ếo ki mê lĕm mơnâ mâ ‘nâng, tơtro ƀă tơdroăng rơhêng vâ dêi rơxông nếo ƀă hên hĕng mâu tơdroăng ki ê.

Mâu tơmeăm khoăng ki tĕn pơchoh ing hmôu, jiâ dêi Tây Nguyên

Rêm ngế ƀă mâu hnoăng cheăng pơrá phá dêi pó, la vâi pơrá veăng kum rak vế ếo pơtâk tiô khôi hmâ dêi vâi krâ-hdroâng kuăn ngo. Tơdroăng mê, vêh mơnhên tối, tuăn mơno, hnoăng cheăng vâi tung tơdroăng veăng rak vế, pơtối mơdêk khôi túa, vêa vong dêi hdroâng kuăn ngo.

Ki păng ‘nâng, mâu tơmeăm tiah hmâ hlo, môi tiah: pơtâk, ếo, ếo ‘ngrôa vâi hmâ pơchoh ing hmôu dêi Tây Nguyên hiăng châ kơdrâm kơdrĕng mơngế kuăn pơlê, mâu tơmối rơhêng vâ. Kố cho tơdroăng ki vâ mơnhên má môi mơhno tối tơdroăng ki lĕm tro tiô khôi hmâ hdroâng kuăn ngo. Tiah mê, mâu khu râ, kơvâ cheăng ki ai tơdjâk kal athế tŏng kum mâu tơmeăm khoăng, mâu tơdroăng ki kal vâ veăng kum pơtối mơdêk po rơdâ tơdroăng cheăng tĕn ếo pơtâk tiô khôi hmâ, ti xê to a kơvâ tĕn hmôu, jiâ mê ối hên mâu tơdroăng cheăng ki ê, môi tiah: tĕn tơmeăm, pong, rơgi, um loăng.

Tung roh ki ai hên mâu tơdroăng chêh tối, mơđah um tiah chal nếo nôkố, ki kơtăn pơla kuăn mơngế ƀă dêi pó hiăng chía kơdroh, xúa ing tơdroăng ki “tiê kơmăi” lơ po ngăn tung internet dêi phôn râng kŏng chal nếo, mê tơdroăng tối tơbleăng, mơhno mơđah tơmeăm khoăng, tung mê, ai tá mâu tơmeăm tiô khôi hmâ xuân tơ’lêi ƀă rĕng tâ. Xua tiah mê, la ngiâ kô ai hên mâu tơdroăng ki vâ mơnhông ƀă blêi chiâng ăm troăng hơlâ ki mơnhông tung cheăng tĕn hmôu, tĕn ếo pơtâk cho hnoăng cheăng ki khu rơxông nếo Jarai, Bơhnéa mơni kô pói tơngah vâ pêi pro.

Ƀai chêh dêi Thak sih Hoàng Thị Thanh Hương ‘na “Troăng hơlâ mơjiâng ƀă mơnhông khu mơngế ki rơkê tĕn tơmeăm khoăng a Gia Lai” mơhno tơbleăng tơdroăng rêh ối tung hlá tơbeăng Nhân dân kơxô̆ a khế 3 hơnăm 2021, ăm hlo mâu troăng hơlâ ki ngế chêh tối mê cho vâ pơtối mơdêk tơdroăng cheăng tĕn hmôu, jiâ, xuân kô tăng rah mơngế cheăng tĕn hmôu, jiâ, tăng mơngế, mâu ngế hơnăm ối nếo ki hâk git kơ khôi túa, vêa vong dêi hdroâng kuăn ngo, tơdrêng amê, hnối khên tơnôu tung tơdroăng thăm po rơdâ hnoăng cheăng vâ mơnhông túa tĕn hmôu, jiâ dêi Tây Nguyên a kong pơlê.

Ki ahdrối tâ, ƀă mơngế ki rơkê tĕn, mơngế hơnăm ối nếo ki hâk vâ kơ tơdroăng tĕn, pơchoh ếo pơtâk kal athế pơtối rak vế tơdroăng (hneăng tơ’noăng, leh mơdĭng mơhno túa lĕm tro hdroâng kuăn ngo...) vâ mơhno tối ki rơkê plĕng, ki ƀĕng ƀeăn dêi tơná, tơdrêng amê, hnối thăm tơrŭm, tơpui tơno mâu tơdroăng ki rơkê plĕng pơla mâu ngế hơnăm ối nếo ƀă mơngế ki rơkê tĕn mê. Mâu ngế ki châ hlo ‘na khôi túa, vêa vong mê cho mơngế ki rêh ối achê, ki xiâm cho hdroâng mơngế Jarai, Bơhnéa ki rêh ối a mâu pơlê cheăm kal athế pôu râng hnoăng cheăng tơná tung veăng kum mơnhông ‘na cheăng tĕn hmôu, pơchoh tiô túa hmâ tung tơdroăng veăng kum mơnhông dêi cheăng tĕn hmôu, ing mâu tơmeăm khoăng ki tơná rơpŏng mê hiăng ai xêh. Ƀă mâu ngế kăn ƀô̆, mơngế pêi cheăng, mơngế pro pơkuâ dêi pơlê cheăm ăm hlo, tơdroăng pơchoh, rôe mâu ếo  pơtâk tiô khôi hmâ ti xê bu vâ sap tung mâu hâi leh mơdĭng, mê tơdroăng ki kal dêi pơlê cheăm akố ối cho tơdroăng ki xâp rơnuâ a tíu pêi cheăng 1 hâi tung 1 măng tĭng cho vâ veăng pơ-ôu hnoăng cheăng dêi hdroâng kuăn ngo.

Tung “Măng tĭng ếo xŏn” pơla hdrối kố nah, vâi nâ o kong pơlê Gia Lai hiăng kơhnâ khât tung tơdroăng veăng tĕn, cho rế vâ pơ-ôu mơhno tối tơdroăng ki hâk tơngăm dêi kuăn mơngế Việt Nam ƀă mâu ếo pơtâk tiô khôi hmâ dêi hdroâng kuăn ngo. Xua ti mê, ƀă kong pơlê ki ai hên khôi túa, vêa vong hên troăng tiah mê, môi tiah kong pơlê Gia Lai kố tơdroăng ki vâ po leh mơdĭng koh pơ-eăng ếo pơtâk cho tơdroăng cheăng pơlê pơla dêi hdroâng Jarai, Bơhnéa, mê xuân cho troăng hơlâ ki vâ kum kân khât tung mơnhông cheăng tĕn hmôu, jiâ tối krê ƀă hnoăng cheăng dêi kuăn ngo tối tơchoâm.

Ksor H’Yuên

Hlá tơbeăng Gia Lai