VOV4.Sêdang - Pêi pro tơdroăng vâ troh hâi leh tơbâ 74 hơnăm Hâi Mô đô̆i rong râ - hlâ hiá lơ 27/7, kơxê lơ 19/7 , pôa Đào Ngọc Dung, Ngế xiâm ngăn cheăng pêi Mô đô̆i tro rong ƀă pơlê pơla rơtế ƀă mâu  kăn pêi cheăng dêi khu xiâm hiăng troh pôu ƀă hlối hbru tơmeăm ăm mâu rơpŏng mơngế ki ai hnoăng tơnêi têa a Hà Nội. Pôa Đào Ngọc Dung rơtế ƀă mâu kăn ki pêi cheăng hiăng troh lăm pôu hbru tơmeăm ăm 3 rơpŏng ki ai hnoăng tơnêi têa a pơlê kong kân Hà Nội, mê cho rơpŏng pôa Phạm Đình Thi, ngế ki tro rong 81%; rơpŏng jâ Đỗ Thị Hành cho ngế kơdrâi ki hlâ ai hnoăng; pôa Nguyễn Văn Thuyết xuân ối a pơlê krâm Long Biên ƀă rơpŏng pôa Nguyễn Tường Vĩnh, tro rong ó 81%, ối a pơlê  krâm Ba Đình.

Lăm pôu mâu rơpŏng ai hnoăng tơnêi têa, pôa Đào Ngọc Dung tối mơnê khât mâu hnoăng veăng ‘no ƀă hía cho ai hnoăng ki kân kĭn dêi rơpŏng, hlối púi vâ mâu rơpŏng hngêi pơtối râk vế tơdroăng ki lĕm tro dêi kăch măng, mơ-eăm tơkâ luâ tơdroăng pá, pêi pro tơdroăng ki lĕm tro ăm kuăn ‘nĕng cháu chái pêi pêi pro, ƀối hriâm tâp, pêi cheăng ƀă pêi lo tơmeăm, ing mê, ‘no hnoăng veăng mơnhông dêi pơlê, tơnêi têa.

Gương tơplôu ƀă tơbleăng