VOV4.Sêdang - Kơxê lơ 15/7, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng ai roh tơpui ƀă pôa Moon Jae-in, Kăn xiâm pơkuâ kong têa Hàn Quốc. Pôa Moon Jae-in mơnhên nhuô̆m tơrŭm cheăng ƀă Việt Nam; tối nhên Việt Nam cho khu tơrŭm cheăng ki xiâm tung Troăng hơlâ tơmiât troh peăng Hdroh tơnêi têa nếo thăm pêi pro dêi Hàn Quốc; tối ăm ‘nâi, Hàn Quốc kô pơtối tŏng kum ƀă tơrŭm krá tơniăn ƀă Việt Nam tung hbrâ mơdât COVID 19; pói vâ thăm tơrŭm tâ mê nếo tơrŭm cheăng pơla péa tơnêi têa tung mâu kơvâ cheăng kâ, tơpui kâ ƀă kong têa ê, gâk kring, cheăng lêng ƀă hía hé vâ rĕng châ pêi lo liăn tê mơdró pơla péa pâ rĕng châ 100 rơtal dollars, djâ tơrŭm cheăng Hàn Quốc – Việt Nam mơnhông mơdêk nếo tơmiât troh leh tơbâ 30 hơnăm mơjiâng tơrŭm cheăng tơpui kâ péa tơnêi têa a hơnăm 2022.

Péa kăn xiâm pơkuâ môi tuăn pơtối po rơdâ tơrŭm cheăng tung mâu kơvâ cheăng, thăm tơrŭm cheăng tung hbrâ mơdât pơreăng ƀă xing xoăng ăm dêi pó vaccine hbrâ mơdât COVID 19, pro trâu hơngế tơrŭm cheăng ‘na Đảng, Kuô̆k hô̆i ƀă pơla péa rơxông nếo péa tơnêi têa, mơjiâng krá tơniăn ăm tơrŭm cheăng pơla péa pâ ƀă kuăn pơlê péa tơnêi têa Việt Nam – Hàn Quốc pơtối mơnhông mơdêk ó rơdêi.

A Sa Ly tơplôu ƀă tơbleăng