VOV4.Sêdng - Tiô rơkong krếo thế dêi Khu xiâm pơkuâ Đảng Kŏng san kong têa Sinuâ, kơmăng lơ 6/7, pôa Nguyễn Phú Trọng, Kăn xiâm pơkuâ hnê ngăn Đảng pơkuâ xiâm Khu râ kăn xiâm Đảng Kŏng san Việt Nam veăng Hneăng hôp kân mơ’no tơdrêng tung um tơvi pơla Đảng Kŏng san Sinuâ ƀă mâu khu đảng tung lâp plâi tơnêi. Hneăng hôp dó inâi ‘’Xua hơniâp lĕm dêi kuăn pơlê, hnoăng dêi khu đảng’’, veăng amê ai dâng 10 rơpâu ngế kăn teăng mâ ing 500 khu đảng ƀă khu tơrŭm cheăng lâp plâi tơnêi.

Pôa Nguyễn Phú Trọng, Kăn xiâm pơkuâ hnê ngăn Đảng

Tơdroăng kong têa Sinuâ krếo thế pôa Nguyễn Phú Trọng veăng hôp ƀă xông tơpui a hneăng hôp mơhno tơdroăng nhuô̆m hnoăng cheăng, tíu cheăng lâp plâi tơnêi dêi Đảng ƀă Tơnêi têa pin, tơrŭm cheăng Việt Nam – Sinuâ. Ki rơhêng vâ tối, tơdroăng pôa Nguyễn Phú Trọng veăng ƀă ai ƀai xông tơpui a hneăng hôp xuân mơnhên a kơlo ki a’ngêi má môi tơdroăng nhuô̆m dêi Đảng pin ƀă Đảng Kŏng san kong têa Sinuâ, tơrŭm cheăng péa Đảng, péa tơnêi têa Việt Nam – Sinuâ; mơhno Đảng Kŏng san Việt Nam đi đo nhuô̆m tơdroăng pêi cheăng tơpui kâ ƀă kong têa ê ing tơdâng tơ’mô, hbrâ rơnáu rơtế ƀă mâu khu đảng, mâu kong têa veăng tơlo hên ăm mâu tơdroăng cheăng tơdjuôm dêi lâp plâi tơnêi.

A Sa Ly tơplôu ƀă tơbleăng