VOV4.Sêdang - Hâi lơ 18/6/2021, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng pơkuâ roh hôp Khu xiâm kal kí, hôp Khu pơkuâ hnê ngăn Đảng vâ séa ngăn, pêi pro khĕn hôu Khu pơkuâ hnê ngăn Đảng kong pơlê Bình Dương hneăng hơnăm 2015 – 2020, Khu pơkuâ hnê ngăn Đảng, Vi ƀan hnê ngăn kong pơlê Bình Dương hneăng hơnăm 2016 – 2021 ƀă mâu kăn ƀô̆ pơkuâ, kăn pơkuâ kong pơlê Bình Dương.

Khu pơkuâ hnê ngăn Đảng kong pơlê Bình Dương hneăng hơnăm 2015 – 2020 pro xôi ‘na tơdroăng pêi xêh môi ngế - ôh tá pêi pro tiô tuăn mơno hên ngế pói vâ ‘na pơkuâ dêi hnoăng ƀă Pơkâ pêi cheăng dêi Khu pơkuâ hnê ngăn Đảng kong pơlê; pêi cheăng ôh tá kơtăng dêi khu râ kăn pơkuâ, hnê mơhno, ôh tá vâ séa ngăn, mê khu pơkuâ hnê ngăn Đảng ƀă đảng viên khoh chiâng pro xôi mâu pơkâ dêi Đảng, luât dêi Tơnêi têa ‘na pơkuâ, xúa tơnêi tíu, liăn ngân, kế tơmeăm khoăng dêi Đảng, Tơnêi têa a Kŏng ti xiâm mơjiâng pro kế tơmeăm ƀă tê rôe ngi kong têa ê Bình Dương (Kŏng ti xiâm 3/2) ối tung Khu pơkuâ cheăng Đảng kong pơlê Bình Dương, pro tro lŭp ó, hía hên liăn ngân tơnêi têa.

Khu xiâm kal kí pơkâ khĕn hôu Khu pơkuâ hnê ngăn Đảng kong pơlê Bình Dương hneăng hơnăm 2015 – 2020 ƀă troăng khĕn tối ƀă pơkâ pêi pro khĕn hôu ƀă troăng pơkâ ăm pơtê cheăng ƀă mâu ngế krê ki tơdjâk troh tơdroăng kố.

A Sa Ly tơplôu ƀă tơbleăng