VOV4.Sêdang - Pôa Nguyễn Xuân Phúc, Kăn xiâm hnê ngăn tơnêi têa nếo pơkuâ Roh hôp má pái Hô̆i đong cheăng lêng ƀă gak kring hneăng hơnăm 2016 – 2021. Kăn xiâm hnê ngăn tơnêi têa tối ăm ‘nâi, Roh hôp roh má pái kô cho vâ mơgêi dêi hneăng cheăng; tơdrêng amê tơpui tơno, môi tuăn mâu tơdroăng xiâm ki kal, mơjiâng tíu ăm tơdroăng pêi cheăng  Hô̆i đong cheăng lêng, gak kring tung hneăng nếo kêi đeăng lĕm hnoăng cheăng tiô pơkâ dêi Luât.

Roh hôp má pái Hô̆i đong cheăng lêng – gak kring hneăng hơnăm 2016 – 2021

Pôa Nguyễn Xuân Phúc tối rơdêi, tung hneăng nôkố, tơnêi têa dế trâm hên pơloăng mơnúa ‘na gak kring tiô khôi vâi krâ nah ƀă tiô troăng ki nếo, tung mê ai tơdroăng kong prâi hơ’lêh, ki rơhêng vâ tối cho pơreăng COVID 19 dế xông tâ tú ó chiâng tơdroăng ki kân dêi tơnêi têa. Tơdroăng kố pơkâ thế khu lêng, ki má lối cho khu lêng, kŏng an ƀă tơpui kâ ƀă kong têa ê thế tơkŭm mơngế pêi cheăng, liăn ngân vâ hbrâ mơdât pơreăng, rak vế ivá ƀă châ chăn dêi kuăn pơlê.

Drêng ai pơreăng COVID 19 a hên kong pơlê peăng Hdroh tơnêi têa, pôa Nguyễn Xuân Phúc pơkâ thế Chin phuh, mâu khu xiâm, kơvâ cheăng ƀă khu râ kăn pơkuâ mâu kong pơlê kơjo tŭm têk ‘na mơngế, liăn ngân hbrâ mơdât pơreăng, ki má lối cho tơniăn tŭm vaccine pâk ăm kuăn pơlê.