VOV4.Sêdang - Drêng tơbâ 20 hơnăm hâi Rơpŏng hngêi Việt Nam lơ 28/6, pôa Nguyễn Xuân Phúc, kăn xiâm hnê ngăn tơnêi têa hiăng pơtroh rơkong rơkâu, tơdroăng ki pơtroh troh tâi tâng mâu rơpŏng hngêi a Việt Nam, tung mê krếo thế rêm rơpŏng hngêi kal xua môi Việt Nam mơ-eăm pêi pro troh lâp plâi tơnêi, khên tơnôu ƀă kro mơdrŏng. Tơdroăng mê ai tíu chêh: “Tung pơla ai pơreăng kân COVID-19 dế ôh tá tơniăn a tơnêi têa pin, hên kăn ƀô̆, ƀok thái pơkeăng, lêng hiăng ôh tá khéa hơ’nêng ƀă tơdroăng ki xơpá rơ-iêo, lăm troh a tíu ki ai pơreăng. Xua rơpŏng hngêi hiăng đi đo cho tíu ki vâ loi tơngah, mơhnhôk vâi tơkâ luâ xơpá, pêi klêi hnoăng cheăng. Hên rơpŏng hngêi veăng kum kế tơmeăm, liăn ngân, ơhnhôk hiâm mơno, djâ troăng ahdrối, pơchân tối  mâu nhŏng o pêi pro tiô troăng hơlâ, tơdjuôm ivá rơtế ƀă Đảng, Tơnêi têa ƀă khu pơkuâ tơdroăng kal kí tung hbrâ mơdât pơreăng vâ Việt Nam chiâng tíu ki bâ eăng châ mâu vâi pú kong têa ê tơmâng xo mơnhên tối khât. Á ôu eăng khê̆n kơdeăn rêm râ, mâu kơvâ cheăng, mâu kong pơlê, mâu khu tơrŭm, mâu ngế krê tung lâp tơnêi têa, pơlê pơla Việt Nam a kong têa ê hiăng ai hên tơdroăng cheăng pêi kơhnâ, veăng mơjiâng rơpŏng hngêi Việt Nam hơniâp ro, rơkê plĕng, mơnhông mơdêk krá tơniăn”.

Katarina Nga tơplôu ƀă tơbleăng