VOV4.Sêdang - Kơxê lơ 29/6, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa tơdah jâ Victoria Kwakwa, Kăn xiâm phŏ hnê ngăn Hngêi arak liăn lâp plâi tơnêi (WB) pơkuâ kơpong peăng mâ hâi lo châu Á ƀă Thái Bình Dương dế ai roh lăm pôu ƀă pêi cheăng a Việt Nam. Phiu ro vêh châ trâm jâ Victoria Kwakwa, ngế pú hmâ xiâm dêi kuăn pơlê Việt Nam, Kăn xiâm hnê ngăn tơnêi têa mơnhên, jâ Victoria Kwakwa ngế ai hnoăng kân kĭn tung tơdroăng thăm pêi pro mâu tơdroăng tơrŭm cheăng châ tơƀrê pơla WB ƀă Việt Nam.

Kăn xiâm hnê ngăn tơnêi têa tối ăm ‘nâi, Việt Nam xuân hiăng pêi pro châ tơƀrê mâu tơdroăng tơkêa bro tơrŭm cheăng ƀă WB; jâ Victoria Kwakwa xuân kheăn kơdeăn Việt Nam mơdât châ tơƀrê pơreăng COVID 19; vêh mơnhên kô tŏng kum Việt Nam tung tâi tâng tơdroăng vâ châ rôe vaccine kum tung hbrâ mơdât pơreăng COVID 19, rak ngăn ivá kuăn pơlê.

Tối troh troăng mơnhông cheăng kâ - rêh ối pơlê pơla dêi Việt Nam tung la ngiâ, jâ Victoria Kwakwa tối, Việt Nam kal tơmâng kơdroh mơjiâng pro on tơhrik ing kơchâ, thăm pơ’lêh mơjiâng pro on tơhrik ing tơmeăm ki krúa ngiât lĕm ing kong prâi tâ.

A Sa Ly tơplôu ƀă tơbleăng