VOV4.Sêdang - Kơxo lơ 13/7, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa tơdah mâu Kăn teăng mâ dêi kong têa Siam, Chile, Cuba, kong têa Rusi pơtroh kơthô râ tơnêi têa klăng roh tơdah hnoăng cheăng Kăn teăng mâ a Việt Nam. Tơdah Kăn teăng mâ kong têa Rusi a Việt Nam, pôa Gennady Bezdetko pơtroh kơthô râ tơnêi têa, pôa Nguyễn Xuân Phúc mơnhên tối, Việt Nam nhuô̆m tơrŭm cheăng tŭm têk ƀă kong têa Rusi, đi đo mơnhên kong têa Rusi cho môi tung mâu khu tơrŭm cheăng ki kal má môi tung troăng hơlâ tơpui kâ dêi tơná, pói tơngah thăm tơrŭm tâ mê nếo ƀă Rusi tung mâu kơvâ cheăng.

Kăn xiâm hnê ngăn tơnêi têa kheăn kơdeăn kong têa Rusi tung mâu hơnăm hiăng hluâ đi đo rak tơniăn kal kí, cheăng kâ – rêh ối pơlê pơla mơnhông tơtêk hôm, ki châ loi tơngah tơnêi têa tung tơleăng mâu tơdroăng lâp plâi tơnêi, kơpong châ mơdêk. Kăn teăng mâ kong têa Rusi mơnhên Việt Nam đi đo cho khu tơrŭm kơjo má môi dêi kong têa Rusi ôh tá xê a kơpong peăng mâ hâi lo pá hdroh châu Á mê ối cho kơpong Châu Á – Thái Bình Dương. Kăn teăng mâ mơnhên kô mơ-eăm thăm tơrŭm cheăng tung hên kơvâ cheăng pơla péa pâ.

A Sa Ly tơplôu ƀă tơbleăng