VOV4.Sêdang - Kơxê lơ 15/7, a tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, kăn xiâm hnê ngăn tơnêi têa hiăng ai rôh tơpui phôn ƀă pôa Joko Widodo, kăn xiâm pơkuâ kong têa Kŏng hòa Indonesia ‘na tơrŭm cheăng pơla péa pâ xuân môi tiah mâu tơdroăng tung kơpong ƀă a kong têa ê ki péa pâ rơtế vâ ‘nâi plĕng. Péa ngế kăn xiâm pơkuâ môi tuăn kal mơdêk tơrŭm, tơpui tối ‘na ki rơkê plĕng tung hbrâ mơdât pơreăng kân COVID-19 ƀă pơtối vâ xúa vaccine tơƀrê. Pôa Joko Widodo, kăn xiâm pơkuâ kong têa Indonesia mơnhên tối khât tơdroăng pêi pro dêi Việt Nam tung pêi pro péa tơdroăng, rế hbrâ mơdât pơreăng, rế mơnhông mơdêk cheăng kâ rêh ối pơlê pơla.

Pôa Nguyễn Xuân Phúc mơnê ƀă tối mâu tơdroăng ki xơpá ki Indonesia dế trâm tung rôh hbrâ mơdât COVID-19; loi tơngah Indonesia rĕng kâi hbrâ mơdât pơreăng ƀă ‘mâi mơnhông cheăng kâ. Kăn xiâm hnê ngăn mơnê Indonesia hiăng tơrŭm lĕm ƀă Việt Nam tung hnoăng cheăng rak vế kuăn pơlê trâm pá xua pơreăng COVID-19; pơkâ thế Indonesia pơtối pro tơ’lêi hlâu ăm kuăn pơlê Việt Nam a Indonesia châ khăm pơlât, klâ ối krê ƀă pơlât tung tơdroăng ki kal má môi.

Nga tơplôu ƀă tơbleăng