VOV4.Sêdang - A Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng ai rôh tơdah jâ Victoria Kwakwa, kăn xiâm phŏ hnê ngăn Hngêi rak liăn kong têa ê WB pơkuâ kơpong Đông Á ƀă Thái Bình Dương dế ai rôh lăm pôu ƀă pêi cheăng a Việt Nam. Tung tơdroăng ki tơpui tơno tơdrăng, hơtô, Ngế pro xiâm hnê ngăn tơnêi têa phiu ro jâ Victoria Kwakwa vêh pôu Việt Nam, tối nhên, WB cho tíu pêi cheăng tơrŭm mơnhông kal đi đo rơtế tŏng kum ƀă veăng kum kơhnâ tung hnoăng cheăng mơnhông cheăng kâ rêh ối dêi Việt Nam; tơdrêng amê hnối mơnhên tối WB ai hên tơdroăng ki tiâ mơnhên kân túa pơkâ tơƀrê, tơtro ƀă mâu túa pơkâ, ki xiâm mơnhông mơdêk dêi Việt Nam tung mâu hneăng.

Ngế pro xiâm hnê ngăn tơnêi têa mơnê WB hiăng kum Việt Nam châ mơdrếo chĕn rĕng mâu kơxô̆ liăn mung IDA vâ ai tơ’nôm liăn tung hnoăng cheăng hbrâ mơdât pơreăng ƀă rak vế mơdêk cheăng kâ rêh ối; mơnhên tối tơdroăng ki rơkê plĕng dêi WB hiăng kum mâu kong têa hbrâ mơdât pơreăng COVID-19, tung mê ai Việt Nam.

Katariana Nga tơplôu ƀă tơbleăng