VOV4.Sêdang - Kơxê hâi lơ 14/6/2021, pôa Phạm Minh Chính, Ngế pro xiâm hnê ngăn Chin phuh hiăng ai rôh tơpui phôn ƀă pôa Jean Castex, Ngế pro xiâm hnê ngăn Kŏng hòa Pơhlăng. Tung rôh tơpui phôn, pôa Phạm Minh Chính mơnhên tối khât mâu tơdroăng mơnhông ki tơniăn dêi tơrŭm cheăng pơla Việt Nam - Pơhlăng tung pơla hdrối nah, tối rơdêi Pơhlăng cho môi tung mâu kong têa tơrŭm cheăng xiâm dêi Việt Nam a châu Âu ƀă rơhêng vâ mơdêk tơrŭm cheăng tâ mê nếo ƀă kong têa Pơhlăng tiô khôi hmâ, loi tơngah ƀă tơrŭm cheăng tung la ngiâ pơla péa tơnêi têa.

Péa ngế kăn xiâm pơkuâ môi tuăn rơtế ƀă dêi rơpó tơpui tối ‘na mâu tơdroăng ki rơkê plĕng tung hbrâ mơdât pơreăng. Ngế pro xiâm hnê ngăn kong têa Pơhlăng tối rơdêi tŏng kum Việt Nam tung tơdroăng ki kum vaccine. ‘Na tơrŭm cheăng kâ pơla péa pâ, péa ngế kăn xiâm pơkuâ hiăng tơpui hên troăng hơlâ pêi pro ki nhên vâ mơdêk tơrŭm cheăng pơla péa tơnêi têa; môi tuăn tơrŭm krá tơniăn, tối tơbleăng, xúa tơƀrê tơdroăng tơkêa EVFTA ƀă rĕng pêi klêi tơdroăng pơkâ EVIPA; pro tơ’lêi ăm tơdroăng ki tê tơmeăm pêi lo ing chiâk deăng dêi Việt Nam ngi kong têa Pơhlăng malối cho mâu plâi kâ dế mot tung rơnó krí dêi Việt Nam môi tiah nôkố.

Katarina Nga tơplôu ƀă tơbleăng