VOV4.Sêdang - Kơxê lơ 2/7, a tíu mơ’no hyôh um Chin phuh, pôa Phạm Minh Chính, Ngế pro xiâm hnê ngăn Chin phuh hiăng pơkuâ Hneăng hôp mơ’no tơdrêng tung um tơvi Chin phuh ƀă mâu kong pơlê ‘na mơnhên tơdroăng cheăng kâ – rêh ối pơlê pơla 6 khế apoăng hơnăm ƀă troăng prôk la ngiâ, hnoăng cheăng, túa pêi 6 khế mơ’nui hơnăm 2021, vâ tơniăn pêi pro hnoăng cheăng péa xôh rế hbrâ mơdât pơreăng, rế mơnhông cheăng kâ – rêh ối pơlê pơla.

Xông tơpui pơxiâm po hneăng hôp, pôa Phạm Minh Chính pơkâ thế, mâu kăn tơkŭm tơpui ‘nâng ‘nâi, tơpui tơdrăng tơdroăng vâ pơkâ mâu hnoăng cheăng, troăng pêi, pơkâ pêi ăm tơtro. Ƀă tơdroăng mơ-eăm cho mơhé rế pá puât, ôh tá tơniăn, rế thăm mơnhông hnoăng kuăn pơlê pơkuâ dêi, rak pêi tiô pơkâ, mơnhông tuăn ngôa rơkê khu pú hên, ing mê, ngăn tiô tơdroăng nôkố pơkâ mâu tơdroăng cheăng, hnoăng cheăng, troăng pêi ki tơtro, vâ tơkŭm pêi pro ăm châ tơƀrê.

Klêi kơ’nâi tơmâng tơdroăng tơkêa tơbleăng mơnhên tơdroăng cheăng kâ – rêh ối pơlê pơla 6 khế apoăng hơnăm ƀă troăng pêi la ngiâ, hnoăng cheăng, túa pêi 6 khế mơ’nui hơnăm 2021, mâu kăn teăng mâ hiăng tơpui tơno mơnhên ‘na mâu tơdroăng châ tơƀrê, mâu tơdroăng pá puât, tá hâi tơtro kal ‘mâi pât ƀă túa pêi ki rơkê tơtro. ‘Na troăng pêi hnoăng cheăng la ngiâ Ngế pro xiâm hnê ngăn tơnêi têa tối rơdêi, khŏm mơ-eăm pêi pro péa xôh ƀă 2 tơdroăng tơtêk cheăng kâ sap ing 6% - 6,5%.

A Sa Ly tơplôu ƀă tơbleăng